Messi tel lohna Miami an tlawm

Lionel Messi-a'n US Open Cup final-ah Inter Miami hruai thleng mah se, hliam vangin final-ah a inlan thei lo a, nimin zing final inkhelah Houston Dynamo chu 2-1 in an ngam lo zui.

Miami club hian kar hmasa khan league match-ah Toronto FC chu 4-0 ngawtin an sawp a, he inkhelah hian hliam vangin Messi hi lakchhuah a ngai. Nimin inkhel pawimawhah a inlan thei lo zui a, an thiampuipa tel loin Inter Miami an chak zo lo.

Fort Lauderdale, Florida-a inkhelah hian Griffin Dorsey leh Amine Bassi (penalty) te chuan Houston tan goal an khung a, Miami tan hun pek belhah Josef Martinez chuan khung ve bawk mah se a team tana phurna a thlen zo tawh lo a, an tlawm.

Miami hian chance nei lo tawp an ni bik lo a, mahse, Houston goalkeeper Andrew Tarbell khelh ṭhat zan an tawn avangin an vanduai ve bawk - kum 36 mi Messi-a'n USA a pan hnuah Leagues Cup a chawi tawh a, a nomawi pahnihna tur erawh a chawi thei ta lo.

Messi bakah hian Barcelona tana a lo khelhpui tawh ṭhin, Miami lama zuitu Jordi Alba chu a inhliam bawk a, final hmaa hliamin a tihbuai Inter Miami an vanduai.

Miami boss Gerardo Martino chuan, "Messi kha a inkhelh loh a tan a ṭha zawk a, minute rei lotê khelhtir pawh kha kan tan chuan risk a sang lutuk," tiin Messi an chhawr loh chhan a sawifiah a, an player chhuanvawr dam leh vat chu an duh ber a nih thu a sawi.

July thlaa MLS club zawmtu Messi hian Miami tan inelna hrang hrangah match 12 khel tawhin, goal 11 a khungsak a, assist vawi nga a nei bawk.