Real an chak lehnghal

Madrid derby-ah Atletico Madrid ngam loin an mualpho a, an league match khelh leh hmasak berah Real Madrid an chak nghal - Carlo Ancelotti naute hian an mikhual Las Palmas chu 2-0 in an hneh a, vanneih zan ni se, goal tam zawk khung thei an ni.

Las Palmas goalkeeper Alvaro Valles a che ṭha takzet a, first half chhung ringawtin vawi sarih ngawt save a nei hman - first half hun pek belh minute thumnaah erawh Valles a ṭang reng thei bik lo.

Season thum zet AC Milan lama loan-a hun hmangtu Brahim Diaz chuan Lucas Vazquez-a siamsak chu goal-ah a chantir a, Rodrygo siamsak chu Joselu chuan minute 54-naah a tauh lut ve leh bawk.

Vawi 21 zet shot neitu Real an chak a, player ṭha ṭhenkhat chawlh hahdamtir chunga an chak theih avangin an lawm a zual ang. Ancelotti chuan Atletico hneh lo aṭang khan player panga a thlak danglam a, Jude Bellingham leh Luka Modric te chu chawlhna hun pek zingah an tel.

Real-in hnehna an chan avangin table-ah pahnihnaah an chho a, pathumna Barcelona aiin point khatin an sang - match sarih khelh tawh aṭanga hmahruaitu chu Girona an ni a, point 19 an nei!

Girona hian khualmualah Villarreal chu 2-1 in an hneh. Mualneitu Villarreal hian minute 49-naa Dani Parejo penalty hmangin hma hruai mah se, Girona hian Artem Dovbyk leh Barcelona aṭanga loan-a an hawh Eric Garcia hmangin an chhanglet a, 2-1 in an chak daih.

Tun season La Liga-ah Girona hian match sarih khel tawhin tlawm an la nei miah lo a, an match hmasa bera Real Sociedad (1-1) an inhnehtawkpui tih loh chu an la chak vek - Spanish coach Míchel enkawl team hian Inrinni zan dar 10:00-ah Real Madrid an mikhual dawn a, an theihna tak tak fiahin a awm ang.

Barcelona chu zaninah hian an inlan leh nghal dawn a, an match hnuhnung bera 2-2 a Real Mallorca inhnehtawkpuitu team hian 5-1 a Almeria sawp hlim Sevilla chu zanin dar 12:30 hian an mikhual dawn a ni.