Ramsdale khelh danah Arteta a lawm

Arsenal manager Mikel Arteta chuan a goalkeeper Aaron Ramsdale khelh danah a lungawi tih a sawi. England international hian Brentford lakah inkhel bul ṭanin goal a chhuah lo.

Nilaini zan Carabao Cup third round inkhelah Gunners hian Brentford 1-0 in an hneh a, goal awmchhun hi minute riatna leka Reiss Nelson khung niin striker Eddie Nketiah siamsak a ni thung.

Tun hnai an match hnuhnung pathumah goalkeeper Ramsdale a inlan lo, coach Arteta-a'n si ban nghak turin David Raya a thlang zawk, season ṭan hmaa a sawi lawk angin tumah khel tur chiangsa an awm bik lo tihna a ni.

League Cup-ah Ramsdale a inlan chungchang sawiin Arteta chuan, "A awmna tur chin leh a hmunah khan hna a tlin leh a, inkhelh theihna remchang a neihah ṭha takin a khel tih kan hmu.

"Team tan thil ṭha tam tak a lo keng lut tawh a, a rilru puthmang hi a ṭhain club chhunga midangte pawh hian kan ngaina vek," tiin a keeper chu a fak mawi nasa hle.

Spanish manager hian fak viau mah se Premier League lamah Ramsdale hi a chhawr chhunzawm dawn em, tih erawh a sawi tel lo thung a, khel phak tur chuan a beih chhunzawm a ngai dawn niin a lang.

Ramsdale hian Bernd Leno nek chhuakin Arsenal si ban nghaktu a ni a, goalkeeper ṭha pangngai tak a ni. Mahse, inkhel ṭhenkhatah tihsual neih zauh a ching a, a phili buai deuh ṭhin bawk.

Arteta-a'n a duhkhawp lo a, goalkeeper dang Raya a la lut. Tun dinhmunah chuan Spanish goalkeeper hi a ring rih zawk niin a lang - England keeper Ramsdale hi inelna lian leh pawimawh a khel phak lo reng a nih chuan lungawi taka awmtir reng erawh a awlsam kher lo ang.

Arsenal hian League Cup fourth round-ah chuan West Ham an lenchilh dawn, chumi hmain Premier League leh Champions League khelh tur an nei dawn, coach tan player siksawi kual ve reng chu a ngai dawn a ni.

September 30, Inrinni zan dar 7:30 hian EPL khel turin Bournemouth an lenchilh dawn. League Cup lama inlan lo player ṭha zawkte chu EPL-ah hian an inlan chhunzawm ve leh thung ang.