Osimhen hoin Napoli an chak

Tun hnai khan Victor Osimhen leh a club inkar a ṭha lo a, mahse Nilaini zan khan Nigerian international striker hi Naples club tan inlanin goal a khung a, an mikhual Udinese lakah 4-1 in an chak.

Serie A inkhel dangah AC Milan pawh an chak, chak loh nei loa kaltluang lai Inter Milan erawh Sassuolo lakah 2-1 in an tlawm a, league match bikah chuan tun season chhunga an chak loh vawi khatna a ni.

Osimhen boruak

Club chuan an player zingah hun harsa leh mite sawisel tawk an awm a nih pawhin an ṭan tlat a, an thlawp zawk ṭhin. Mahse, Napoli erawhin an striker ṭha ber Victor Osimhen chu fiamthu thawh nan an hmang!

Social media pakhat TikTok lamah Napoli hian Osimhen-a penalty hlah chu fiamthu thawh nan an hmang a, video mawi lo tak siam chu an tarlansak, hei hi rang taka paih (delete) ni mah se mi tam takin an hmu hman.

Napoli thil tih avang hian Osimhen a lawm lo, social media lama Napoli jersey a hakna thlalak leh video zawng zawng a paih bo nghal vek a, a agent Roberto Calenda chuan dan hmanga an beih let tur thu a sawi chhuak nghal ve bawk.

Calenda chuan, "Fiamthu thawh nana Victor-a video an hman hi paih leh ni mah se khawvelin a hmu hman tho a, keini chuan a zahawmna humhim turin hma kan la ang," tiin X (Twitter) lamah a ziak a ni.

A inlan

Boruak ṭha lo nei mah se Napoli tan Osimhen a inlan tho a, an goal pahnihna a khung. A goal khung hi a lawm (celebrate) mai lo a, a ṭhiante chuan an va lawmsak thung a ni - hlim leh lawm tak chungin a khel lo tih a chiang.

Napoli coach Rudi Garcia chuan, "Victor nen kan inkar boruak a ṭha a, he club jersey hi hak nuam a tiin club hmathlir hi 100%-in a ringtawk a, a rilru a pe bawk tih ka sawi ngam.

"Bologna nen goal awm loa kan inhnehtawk khan kan vaiin kan thinrim, a bik takin Victor khan penalty a hlah avangin hrehawm a tizual," tiin an tunlai boruak a sawi a, khelmual pawn lam thil ngaihtuah tur awm ta chu buaithlak a tih thu a sawi bawk.

An match hnuhnungah goal khung lo mah se Udinese lakah erawh an ze pangngai an chhuah leh tawh a, striker Osimhen bakah hian Piotr Zielinski, Khvicha Kvaratskhelia leh Giovanni Simeone ten an khung bawk a ni.

Chhuak ta se?

Victor Osimhen hi kum 24 mi chauh a la ni a, theihna nei sang leh hmabak êng tak nei a nih avangin amah la lut duhtu chu an tam dawm a, a khelh mekna Napoli tan chânna lian tak a tling ngeiin a rinawm.

Kum 2020 nipui lai khan Osimhen hian Napoli hi a zawm a, season hmasa khan Serie A match 32 a khelh aṭangin goal 26 a khung a, kum 33 hnua a vawi khat nan Naples club hi Italian champion a nihpui.

Nipui bazar lai khan European club lian dangte nen sawizawm a ni - Premier League club lian Manchester United leh Chelsea te hming pawh a ri, mahse chhuak loin Napoli tan a khel chhunzawm ta zawk.

Tunah boruak ṭha lo an nei leh a, khawthlang chanchinbu mite chuan striker ṭha dap reng Chelsea nen an sawizawm leh nghal a, mahse hei erawh thuthang chauh a la ni - engpawh ni se thlasik bazar tingaihnawmtu chu a nih ngei a rinawm.

Inkhel dang

AC Milan pawh Inter Milan laka an mualpho hnuah an tho chhuak a, inelna hrang hrangah match thum chhung tlawm loin an kaltluang leh ta. Nilaini zan Serie A inkhelah Cagliari chu 3-1 in an hneh.

Mualneitu Cagliari lamin minute 29-naah Zito Luvumbo hmangin khung hmasa mah se, mikhual tem tan Noah Okafor chuan sutin, a hnuah Kikayo Tomori leh Ruben Loftus-Cheek ten an khung belh a ni.

Serie A match nga thleng an khelh chhung kha chuan Inter Milan hi chak vek thei awmchhun an ni a, mahse 100% chak record an neih hi chhawmnun reng theih a ni bik lo - defender Denzel Dumfries goal khung an chakpui zo lo.

Sassuolo tan Nedim Bajrami leh Domenico Berardi ten second half-ah si phurh an sut bakah chakna goal an khung a, tun season chhunga a vawi thum nan an chak, point kua hmuin table-ah pariatna dinhmun an luah.