Djokovic nena inel a nuam - Alcaraz

Carlos Alcaraz chuan player ṭha bik Novak Djokovic nena inelna neih chu nuam a tih thu a sawi a, he inelna hian player ṭha leh hriam zawkah a chher chhuak mek tih a sawi bawk.

Roger Federer a chawl tawh a, hliam vangin Rafael Nadal a inkhel thei lo mek - Djokovic tan player ropui pahnihte inkhelhpui theih a ni tawh lo, hetiang boruak karah hian Alcaraz a rawn lang.

Spanish tlangval Alcaraz hian theihna a nei sang, world ranking lamah pawh Djokovic nen an inel zak zak ta, tun season tawpah hian tu zawk nge number 1 ni chunga kum tawp khar tur a la chiang lo.

Alcaraz chuan, "New York khawpuia Novak Djokovic inkhel kha kan en vekin ka ring, a khel ṭhain a nghet takzet. Chuvangin a lak aṭanga number 1 nihna chhuhsak leh chu thil harsa tak a ni ngei ang.

"Thil theih loh erawh a ni dawn lo thung. World number 1 nih let leh hi tih ngei ngei tur a ni hran lo, amaherawhchu kan inkhel a nih chuan khawvela a ṭha ber nih kan tum tur a ni," tiin a sawi.

Wimbledon final-ah ropui takin Alcaraz hian Djokovic a hneh a, mahse inelna lian hnuhnung zawkah erawh Serbian star Djokovic bawk a champion - Grand Slam title 24 a nei tling ta hial.

Tunkar aṭang hian China Open an khel dawn a, he hunah hian Alcaraz a inlan dawn, tukin hian seeded pakhatna Alcaraz hian a match hmasa ber atan German tlangval Yannick Hanfmann a hmachhawn ang.