Australia an chak, India-in series an la

Cricket World Cup 2023 hmaa inpuahchahna hnuhnung berah Australia chuan India chu 66 runs-in an hneh a, Men in Blue hian match hmasa pahniha hnehna an chan avangin series erawh 2-1 in an la tho.

Saurashtra Cricket Association Stadium, Rajkot-ah Australia-in bat hmasain 352 runs an siam a, India-in 286 runs chauhin an chhanglet. Aussies hian whitewash an pumpelh bakah inelna thlengtu leh champion rinkai zinga mi India an hneh avangin World Cup atan inrintawkna an nei sawt ang.

Tun hma aṭanga pressure sang ngam ṭhin Australia-in an zia an chhuah. David Warner-a'n bul rawn ṭan ṭhain kil tinah ball a hlap chhuak ta emaw tih mai tur a ni a, ball 34 lekah 56 runs a vaw chhuak.

Top order dang Michell Marsh (96), Steve Smith (74) leh Marnus Labuschagne (72) te an che ṭha a, Australia hian 400 runs pawh an siam thei mai ang tih tur khawpin an che ṭha. Mahse, middle order an che ṭha bik lo a, 352/7 runs-ah an tawp.

India tan target sang tak a ni hrim hrim a, beisei bo tawp erawh a ni lo. ODI match hmasa panih khel lo captain Rohit Sharma a rawn kir a, Aussies bowler-te a chhaih buai hle. Rohit bul ṭan ṭhat vang hian India-in beiseina an nei hman a, pitch lah batter tana siam a nih bawk avangin mipui an phur.

Mahse, India batter-te an huaisen tawk lo a, target a san hret bawk avangin over 49.4-ah 286 runs chauh an siam. Rohit Sharma chuan, "Chak lo mah ila tun series kan khelh danah lawmna tur a awmin ka hria. Match tawp bera kan result hi chu kan duh dan a ni lo a, team-ah nghawng a nei lo bawk ang. World Cup khel tur squad a chiang a, player tinin an hna tur an hre bawk," tiin World Cup hmachhawn tura an inpeih thu a sawi.

India hian World Cup atana inpuahchah nan England leh Netherlands te an hmachhawn leh ang a; October 8, Pathianni hian World Cup-a an match hmasa berah Australia an hmachhawn ang.