Marseille coach thar Gattuso

Ligue 1 club Marseille chuan an coach thar atan Gennaro Gattuso an la lut, Italian manager hian kal chhuak ta Marcelino hmun ruak luah turin kum 2024 June thla thleng daih contract a ziak.

Kum 45 mi Gattuso-a contract hi season khat chhung atana pawhsei theih tura tih a ni bawk a, tun kartawpa AS Monaco nen Ligue 1 an khelh hunah a naute a kaihruai hman tura beisei a ni.

Italian manager Gattuso chuan, "Marseille enkawl hi chona lian tak a ni dawn, he club hian France ramah chauh ni loin European football ang pawhin sulhnu a nei ṭha a, ropui taka kan thawh chhuah theih ngei pawh ka ring," a ti.

AC Milan leh Napoli te pawh enkawl tawhtu Gattuso hian Valencia pawh a kaihruai tawh a, kumin January thla khan Spanish club hian an ban - La Liga club a chhuahsan hnuah tun ṭum hi hna a neih lehna hmasa a ni.

Player a nih laiin Gattuso hian AC Milan tan match 468 a khel - Serie A leh Champions League nomawi pahnih ve ve a lakpui a, an ram Italy chu FIFA World Cup 2006 khan a champion pui bawk.

Team enkawl hna a thawh chinah chuan Napoli tana Coppa Italia title a lak bak chu nomawi dang a la chawi rih lo a ni.