Kanan-in hma an hruai thei dawn em?

ADFA First Division inelna chu vawiin hian chhunzawm a ni dawn a, round 5 khelh zawh a ni ang. Chawhma dar 10:00-ah Kanan FC leh Sihphir Venghlun te RG Stadium-ah an inkhel dawn a, coach Chawngthansanga enkawl Kanan hian hnehna an chang a nih chuan table chung berah an kir leh thei ang.

First Division-ah hian team 10 an awm a, team tin an intluk tlang hle. Sihphir Venghlun hi buaina siam avangin point khat paihsak an ni tawh a, heti chung hian point ruk an la nei pha tho. An match hnuhnung berah Siphir Venghlun hian 1st Bn MAP Academy 6-0 in an sawp a, an phur lai tak an ni.

Chutihrualin Kanan hi First Division atana inpuahchahna nei ṭha leh sum seng nasa ber zinga mi an ni a, tuna hmahruai mektu Bethlehem VT nen an inhnehtawk tih loh chu an la chak vek.