Vawiinah Second Division final

Vawiin chawhnu dar 1:00 hian RG Stadium-ah Aizawl DFA Second Divison Season Opening Tournament final khelh a ni dawn a, College Veng FC leh Tuithiang FC te an inkhel dawn. College Veng hi tualchhung football-ah chuan club hlun tak an ni a, Tuithiang erawh tun hnaia intuai thar an ni thung.

College Veng hi Siakhamakawn FC, Chaltlang FC leh FC Kulikawn te nen group khatah awmin point nga hmuin an inpetling hram. Quarterfinal-ah College Veng hian Hlimen an hneh a, hun pangngaiah 2-2 a inhnehtawkin penalty shootout hmangin an chak. Semifinal-ah Armed Veng 2-1 in an hneh a, B. Zoramthara enkawl College Veng hi harsa taka final inpettling an nih avangin nomawi inchuhnaah pawh hian an hriam tawh khawp ang.

Tuithiang FC hian Second Division inelna hmachhawn turin playoff aṭangin an inpetling a Season Opening atan hian inpuahchahna ṭha tak an nei, a tih theih. Group stage-ah Tuithiang hi Zotlang FC, CCR leh Venghlui FC chungah an awm a, pakhatna nichungin quarterfinal an lut. Quarterfinal-ah Zemabawk 3-0 in an hneh a, semifinal-ah Saikhamakawn 5-1 in an sawp leh bawk. Final an thlen chhoh dan thlirin Tuithiang hi rinkai zawk an ni.