Serena hnehin Kerber a champion
Angelique Kerber chu Australian Open champion thar a ni ta. Germany star hian a Grand Slam title hmasa ber la tur hian Inrinni tlai khan champion lai Serena Williams a hneh.
Rod Laver Arena-ah seeded pasarihna Kerber hian seeded pakhatna Williams lakah darkar hnih leh minute riat chhungin 6-4, 3-6, 6-4 in hnehna a chang.
World number 1 Serena Williams hian Grand Slam title 21 a la tawh a, German hranghlui Steffi Graf record vawi 22 champion nih rual turin vawi khat champion bak a mamawh tawh lo. Mahse, Kerber hian a hnampuinu record an tluk mai tur chu a lo humhim sak ta a ni.
German tan Kerber
World number 1 hlui Steffi Graf-i'n kum 1999-a French Open title a lak hnuah German hmeichhe zingah Grand Slam title la thei an la awm leh lo a, ani hnuah Kerber hi major tournament-a champion leh thei hmasa ber a ni.
World number 2 ni thar tur kum 28-a upa Kerber hi kumin Australian Open first round-ah a chak lo teuh hle a, Misaki Doi match point hmuh chu a pawt thla leh. Hemi hnuah rawn khel ṭha chhoin final a luh thlengin set a hloh tawh lo; Serena lakah set khat hloh leh mah se a champion zui ta tho a ni.
Mumang ramah
Kerber leh Serena hi tun hmain vawi ruk an lo inhma-chhawn tawh a, heng zingah hian American Williams hian vawi nga hnehna a chan avangin final-ah pawh chak zawk ni tura beisei a ni. Mahse, beisei loh leh rin loh angin thil a thleng thung.
Champion thar Kerber chuan, "Ka naupan tet lai aṭanga duhthusam leh suangtuahna chu a takin a rawn thleng dik ta. Final-ah Serena hnehin ka champion a, ka hlim a, ka lawm a, engkim hi a fuh vel vek a ni ber mai," a ti.
Serena-i'n a lawmpui
Australian Open vawi ruk champion tawh Williams chuan, "Khawl ka ni bik lo a, engtik lai pawn ṭha taka khel reng thei ka ni bik lo," tiin a khelh ṭhat ber ni a ni loh thu a sawi.
Williams chuan lawmpuina thu sawi chhunzawmin, "Angie, ka lawmpui che, he hlawhtlina hi i phu ang ngeiin i sual chhuak a ni. Ka duhsakna sang ber ka hlan che a, hetiang dinhmuna din a hlimawm tur zia pawh ka hriatthiam pui che," tiin final-a a hneh loh chu a lawmpui thiam hle.