I League-ah Bengaluru an tho leh nghal

I League-ah Mumbai FC laka chak lo Bengaluru an tho chhuak nghal a, Inrinni khan Barasat Stadium-ah East Bengal chu 1-0 in an hneh a, league hmahruaitu an nih chhunzawm zel. Inkhel dangah champion lai Mohun Bagan-in Sony Norde goal hnih hmangin DSK Shivajians chu 2-0 in an hneh ve bawk.

Bengaluru nge nge

2014 champion Blues hian Red and Gold brigade hi tun hmain an mualah an la hneh ngai lo a, tun ṭum hi an vawi khat hnehna a niin goal awmchhun hi minute 60-naa Sunil Chhetri khung a ni.

Ashley Westwood-a'n Mumbai FC an hneh loh ṭuma chesual keeper Lalthuam-mawia aiah Amrinder Singh chu a vawi khatna atan a luhtir a, hero of the match a thlan a ni nghal. Champhai tlangval Thuama tan first eleven chan let a harsa sawt dawn niin a lang.

Bengaluru bul ṭantu zingah rawlthar duhawm Malsawmzuala leh defender ṭha Lalchhuanmawia te an tel a, Mizo player pahnih hi an khel ṭha dun hle. East Bengal lamah erawh Mizo player-te an inlan lo.

Bagan tan Norde

Shree Shiv Chhatrapati Sports Complex, Pune-ah DSK-in an home match hmasa ber an khel a, champion lai Bagan lakah point an hlawhchhuak zo lo.

Mariners tan Haitian winger Norde-a'n minute 12-na leka goal hmahruai a khung a, minute 53-naah goal hnihna a khung leh bawk. Minute 75-naah Lalhmangaihsanga Ralte-in Bagan striker Jeje Lalpekhlua a tihtluk vangin yellow card vawi hnihna a hmu a, hnawhchhuah a ni.

Hnahthial tlangval Jeje hian tun season I League-ah a vawi khatna atan starting eleven a chang a, Ramhlun South tlangval Zohmingliana Ralte-in inhliam vanga East Bengal a hmachhawn theih loh hnuah DSK khelh ṭumin bul a ṭan leh bawk.

Mohun Bagan hian AFC Champions League Preliminary Round 2-a Shandong Luneng Taishan hmachhawn turin Jinan, China an pan nghal a, February 2-ah an inhmachhawn ang.