FA Cup United, City leh Spurs chak zanah Liverpool chak zo lo

Inrinni zan khan FA Cup fourth round-ah Premier League club engemaw zat an inlan a, club langsar zingah Tottenham Hotspur leh Manchester City-te'n an khingpui ve ve an sawp laiin Liverpool erawh an chak zo lo.

Zirtawpni zana FA Cup in-khel awmchhunah Manchester United chuan Louis Van Gaal-a phurrit ti kiang turin Derby County chu 3-1 in an hneh bawk.

United tan Rooney

Derby County khelmuala inkhelah United tan captain Wayne Rooney chuan yard 20-a hla aṭangin goal ropui a khung a, kumina match ruk a inlanah goal ruk a khung ta.

Derby tan George Thorne-a'n sut ve mah se Manchester-in Daley Blind leh Juan Mata goal hmangin an chhanglet lehnghal a, FA Cup fifth round an inhlangkai.

English striker Rooney-a'n United tan goal 243 a khung tawh a, Manchester United tana goal khung hnem ber Bobby Charlton-a record goal 249 khung turin goal ruk chiah a mamawh tawh.

City chakna Iheanacho

Manchester City-in Premier League club Aston Villa chu 4-0 in an sawp a, Villa Park-a in-khelah hian player langsar ber chu goal thum khunga hat-trick siamtu Kelechi Iheanacho a ni. City tan Raheem Sterling chuan goal khat dang a khung ve bawk.

Manchester City manager Manuel Pellegrini chuan, "Kele--chi hi player naupang leh duhawm tak a ni a, ka hlim hle a ni. Stevan Jovetic leh Edin Dzeko-te kan chhuahtir chhan chu Kelechi hi nitin kan hmuh vang a ni a, eng nge a tih theih hi kan hria a ni," tiin a rawlthar striker chu a fak hle.

Spurs chak chiang

Season duhawm tak hmang mek Tottenham-in league-a an chet ṭhat cup competition lam-ah pawh an chhawm nung zel a, khualmualah League One club Colchester United chu 4-1 in an sawp.

Spurs tan Nacer Chadli chuan goal hnih a khung bakah Eric Dier leh Tom Carroll ten goal khat ve ve an khung a, Colchester goal hi Ben Davies-a'n an lama a tih luh a ni.

Tun hnaia khualmuala match sawm an khelha tlawm hmel la hmu lo Spurs tan kum 2012 hnua FA Cup fifth round an khelh leh hmasa ber tur a ni ang.

Reds chak zo lo

Liverpool-in Anfield-ah West Ham an mikhual a, Reds rawlthar rual te'n goal an khung theih loh avangin team pahnih hi goal khung loin an inhnehtawk. Hammers khelmualah replay an la khel leh ang.

West Ham tan keeper Darren Randolph-a khel ṭha a, Joao Teixeira, Cameron Brannagan, Joe Allen leh Christian Benteke-te goal shot ṭha tak chu a dang vek.

Liverpool tana inlan zing-ah kum 27-a upa Simon Migno-let chu player upa ber a ni a, Brad Smith, Brannagan, Ke-vin Stewart leh Teixeira-te hi Premier League-a inkhel bul la ṭan lo vek an ni.