I League U18 Aizawl FC dinhmun a ṭha lo

Pathianni khan Aizawl FC chuan I League U18-ah Pune FC goal awm loin an draw a, Group B-ah pahnihna dinhmun luah mek mah se semifinal lut turin an dinhmun a ṭha lo hle.

Aizawl FC-in Thawhlehni hian group match hnuhnung berah Group B hmahruai Salgaocar an hmachhawn dawn a, Goan club lakah point thum an hmu lo a nih chuan semifinal luh aiin luh loh a rinawm zawk.

Group A-ah Mizo pakaw awmna DSK Shivajians Liverpool Academy-in match hmasa bera AIFF Academy an draw hnuin Pathianni khan Lonestar Kashmir 4-0 in an sawp. DSK goal hi Mizo naupang khung vek a ni a, Lalianzuala Chhangte chuan goal hnih a khung bakah Jerry Mawihmingthanga leh Lalruatpuia ten goal khat ve ve an khung bawk.