Barcelona lakah Atletico an tlawm
Inrinni zan khan La Liga-ah khawvel ngaihven inkhel hmuhnawm a awm a, league hmahruatu ni tura inchuhna inkhelah Barcelona chuan 2-1 in Atletico Madrid an hneh.
Nou Camp-ah mikhual team tan ṭan aṭanga minute 10-na lekah Koke chuan goal hmahruai khung mah se Barcelona-in Lionel Messi leh Luis Suarez hmangin an chhang let ve lehnghal a, Atletico defender pahnih Filipe Luis leh Diego Godin-te hnawhchhuah zui an nih bawk avangin mikhual team an tho thei tawh lo.
Barcelona striker Luis Suarez-a'n league-ah goal 19 a khung ta a, tun season inelna hrang hrangah match 32 inlanin goal 31 zet a khung ta.
La Liga champion?
Nou Camp-a team pahnih an inhmachhawn hma hian an point hmuh zat a in ang a, an inkhelh zawh meuh erawh chuan khelh khata khel tlem zawk nichungin Barcelona-in point thumin hma an hruai fal tawh.
Catalan club hian thlasik chawlh an hman zawh hnuah league match paruk khel leh tawhin vawi nga a chak zawkah an ṭang a, match 17 khelh tur la hmabak mah se league nomawi chawi tura rinkai ber an ni leh der tawh. Barcelona hian April thla tira Real Madrid an hmachhawn tur tih loh chu fixture hautak an nei tawh lo a, Real lah hi anni aia khel tam zawk nichunga point sarih a hniam an nih avangin Barca tan hlauhthawn tur a vang hle.
Atletico erawh Nou Camp-a league match sawm an khelh hnuah chak hmel an la hmu thei chuang lo a, Diego Simeone-a naute hian Barca tlanpelh theihna remchang an neih an chhawr bawk si loh avangin champion tur chuan Barca chet chhiata an innghah tel a ngai tawh ang.
Red card
Atletico player pahnih ngawt hnawhchhuah an ni a, si phur chunga player hnawhchhuah an nih chuan team tan thawh leh a harsa tawh.
Minute 44-naah Felipe Luis chu Barcelona thiampuipa Lionel Messi chu ball laksak tum tho siin a khup zawnah a tlawh lui a. Argentine Messi-a'n hliam pui tuar
Player sawm nichung pawha Barcelona-te ang hmachhawn a hautak dawn tehlul nen yellow card hmu tawh Godin-a'n a hnampui Luis Suarez chu chiang zetin a tackle a, Barca forward hi uar taka a tluk avangin Atletico defender hi hnawhchhuah a ni.
Player pakua nichunga Nou Camp-a Barcelona hmachhawn Atletico tan beiseina a tawp nghal a, he result hi an nomawi beiseina ti tawp theitu a ni bawk.
Eng nge an sawi?
Barcelona coach Luis Enrique chuan Antoine Griezmann-a goal shot ṭha taka dangtu a keeper Claudio Bravo fakin, "Kan goal khung tluk zeta pawimawh chu Bravo-a'n Griezmann-a ball pet a dang kha a ni, " a ti.
Enrique chuan sawi chhunzawmin, "Goal kan chhuah hma avangin kan buai a, hetihrual hian min
ṭhawng harhtu ṭha tak a ni bawk," tiin an goal chhuah hma chungchang a sawi.
Atletico Madrid coach Diego Simeone chuan, "Ka team-te khelh dan kha ka chhuang takzet a ni. Inkhelh chhung zawngin an chi ai lo. Kan chak emaw chak lo emaw zanina kan chak loh dan erawh a lawmawm lam a ni. Chance vawi hnih chiah an nei a, an khung ve ve. Player pakua nichungin Barca tlarhnung kha kan chhaih buai fo a ni," tiin chak lo mah se a naute khelh danah a lawm.
Barcelona coach Luis Enrique-a'n Lionel Messi tlawh luitu Filipe Luis chet dan a dem thu na taka a sawi laiin Simeone-a'n a player te chet danah sawisel tur a hriat loh thu a sawi thung.