Spurs-a kum thum dang cham tur Dembele

Tottenham Hotspur midfielder Mousa Dembele chuan White Hart Lane-ah kum thum dang cham turin contract thar a ziak.

Kum 28-a upa midfielder hian kum 2012 khan Fulham aṭangin Spurs hi pound maktaduai 15-in a zawm a, tun season-ah match 18 inlanin goal thum a khung tawh.

Belgium international chuan, "Kan khelh dan, club-in hma kan sawn dan leh engkim hi a ṭha vel vek a, mi tupawhin he club-a awm hi chu an duh vek a ni. Contract thar ka ziak thei hi ka in chhuang takzet a ni," tiin Spurs tana a khel chhun-zawm zel thei tur chu a lawm hle.

Hetihlai hian Dembele pakhat-ah Spurs an lungawi tawk lo. Fulham striker Moussa Dembele chu lakluh tumin an dawr mek a, pound maktaduai 5 man striker hian White Hart Lane-ah medical a nei tawh.

Kum 19 leka upa striker hian tun season-ah Championship club tan hian goal 11 a khung tawh a, Spurs hi a zawm a nih pawn season tawp thleng Craven Cottage lamah hian loan-in a kir leh ang.