Bundesliga-ah Aubameyang leh Chicharito langsar zel

Inrinni zan Bundesliga inkhelah Borussia Dortmund chuan 2-0 in Ingolstadt an hneh a, player langsar ber chu goal hnih khungtu Pierre-Emerick Aubameyang a ni.

Manchester United-a chhuah-san hnua che ṭha tak Javier Hernandez-a'n goal khung a
ṭhulh thei bik lo. Chicharito tia hriat lar Bayer Leverkusen striker hian 3-0 a Hannover an hnehna inkhelah goal hnih a khung.

Bundesliga table-a pahnihna dinhmun luah mek Borussia Dortmund-in league match an hmachhawn hnuhnung parukah vawi nga hnehna an chang ta a, hmahruaitu Bayern Munich nena an inthlauhna erawh point nga lai a ni.

Mahse, Bayern hian nizan khan league match-ah Hoffen-heim an mikhual a, an result a zirin Dortmund nena an inthlauhna hi la danglam leh thei a ni.

Gabon striker Aubameyang-a'n tun season league match 19 a inlanah goal 20 a khung tawh a, Bundeslig-ah top scorer a ni mek. Tun season-a inelna hrang hrangah match 29 khel tawhin goal 29 a khung tawh.

Bayer Leverkusen-in season thara Champions Lea-gue khelh an inbeisei ve zel bawk a, Bundesliga table-ah palina dinhmun luahin pathumna Hertha Berlin chu point thumin an pha lo mek. Hertha hian Inrinni zan inkhelah Werder Bremen chu 3-3 in an inhnehtawkpui a ni.

Leverkusen tan Javier Her-nandez-a'n goal hnih a khung bakah hian Stefan Kiessling chuan goal khat a khung ve bawk. Mexican striker Chicharito-a'n league match 16 a inlanah goal 13 a khung tawh a, tun season-ah inelna hrang hrangah match 24 inlan tawhin goal 21 a khung.