Novak Djokovic Aussie six-pack

Novak Djokovic chuan a vawi ruk nan Australian Open nomawi a chawi. Nimin tlai khan Andy Murray chu straight set-in a hneh.

Road Laver Arena, Mel-bourne Parh-ah world number 1 Djokovic hian darkar hnih leh minute 53 chhungin world number 2 Murray lakah 6-1, 7-5, 7-6 in hnehna a chang.

Final inkhelah hian inkhelh ṭan tirh aṭangin Djokovic-a'n ro a rel tluan parh. Murray-a'n inrintawkna a hloh a, set hnuhnung ber tie break an khelh laiin vawi hnih ngawt unforced errors a nei.

Player ropui pahnihte hi Grand Slam final-ah vawi kua an inhmachhawnna niin heng zinga vawi sarihah hian Djokovic-a'n hnehna a chang. Murray hian Wimbledon (2013) leh US Open (2012)-ah te hlawhtlinna a chang ve thung a ni.

Serbian thiampuipa Djokovic hian Grand Slam title vawi 11 a lakna chiah a ni a, Rod Laver (11) leh Bjorn Borg (11) te record a nih rual chiah. Ani aia champion tam chu Roger Federer (17), Pete Sampras (14), Rafael Nadal (14) leh Roy Emerson (12) te chiah an ni tawh.

Vanglai hmangtu Djokovic

Kumin Australian Open-ah hian Djokovic hian set thum chiah a hloh a, he inelna a champion hnem ber, vawi ruk champion tawh Roy Emerson record a nihrual chiah. Tunlaiin ṭhalai zingah six pack abs nei duh, nei thei lo an tam laiin Djokovic erawhin Australian Open nomawi vawi ruk a chawi a thung - a record hi a ropui hle.

Kum 28-a upa Djokovic hian nikum khan Australian Open, Wimbledon leh US Open title a la thei a, kuminah major tournament hmasa berah hnehna a chang leh bawk. 2015 French Open final-ah erawh Stan Wawrinka a ngam lo thung.

Tun dinhmunah Grand Slam champion hnem ber kum 34-a upa Federer leh kum 29-a upa Nadal ten beisei anga an khelh chhuah theih tawh loh avangin Djokovic hian daltu a hmu lo a ni ber.

Novak Djokovic hian 2015 US Open hnuah match 39 khel tawhin vawi khat chiah chak loh a la nei; ATP World Tour Finals group match-ah Federer a hneh lo, mahse he inel--
naah pawh hian a cham-pion zui tho.

Murray a vanduai

British mipuite ṭan rawn Murray hian Australian Open final hi vawi nga a khel tawh a, mah se a chak lo zawkah a
ṭang vek. Kum 2011, 2013, 2015 leh 2016 final-ah te Djokovic a hneh lo a, kum 2010 khan final-ah tho Federer lakah a lo tlawm tawh bawk.

Kum 28-a upa Murray hi khawvela a ṭha berte zinga mi ni mah se a kum rualpui Djokovic a tluk loh avang leh Federer leh Nadal te vanglaia rawn chawr chhuak ve a nih avangin Grand Slam nomawi a chawi hnem tawk lo.

Eng nge an saw?

Grand Slam vawi 11 cham-pion tawh Djokovic chuan, "Rod Laver leh Roy Emerson te dinhmun ang ka thleng ve mai hi mak ka tiin ka lawm em em a, player ropuite kianga ka hming an ziak tel ve tur hi ka tan chawimawina a ni. Ka team te chungah ka lawm hle bawk," a ti.

Djokovic chuan a khingpui chungchang sawi chhunzawmin, "Andy hi a vanduai zawkah ṭang rih mah se nakinah hlawhtlinna a la neih ngei ka beisei, a chhan chu ani hi chu player ṭha bik leh tumruh a ni," a ti.

Grand Slam vawi hnih champion tawh Murray chuan, "Novak ka lawmpui che, Australian Open title vawi ruk lak hi chu mi bikte chauhin an tih theih a ni," tiin lawmpuina thu a sawi.