Mizoram U16 team champion

Rajiv Gandhi Khel Abhiyan (RGKA) hnuaia khelh National Level Sports Competition-ah Mizoram U16 mipa team chu football inelnaah an champion.

Mizoram hian final-ah minute 55-naa R. Lalnunmawia goal hmangin Tripura chu 1-0 in an hneh a, inelna neihna hmun hi Pondicherry (Puducherry) a ni. Vanromawia kaihhruai Mizoram team hian Bihar leh Rajasthan te an hneh hnuah semifinal-ah West Bengal an hneh a, final-ah Tripura an hneh leh bawk.

Mizoram tana thu lawmawm chu Panchayat Yuva Krida Aur Khel Abhiyan (PYKKA) a nih lai leh RGKA hming a put hnua Mizoram mipa football-a an champion hmasak ber ṭum a ni.

Mizoram coach Vanromawia (VR-a) chuan, "PYKKA leh RGKA hming a put hnua champion hmasa ber kan nih avangin kan lawm khawp mai. Kan champion danah erawh inchhuang thei kan ni lo a, kan ṭawngṭaina leh midang min ṭawngṭaipui vang liau liau a ni. Hemi tournament khel tura kan inbuatsaih aṭangin insum a ngaihna apiangah kan naute insum turin kan fuih a, game kan zir bakah nungchang mawi kan zir tel bawk a, Pathianin malsawm tlakah min ngai a ni ang, champion hial kan lo ni thei ta a, kan dil ṭhin ang chiahin Pathian ropui nan kan champion hi kan hlan a ni," tiin Vanglaini palai a hrilh.

Mizoram coach VR-a chuan kawng tinrenga anmahni puitu Pondicherry (Puducherry) a Mizo Welfare te chung-ah lawmthu a sawi tel bawk.

Champion Team

1 Vannunmawia

2 Zothantluanga

3 Joseph Lalrinawma

4 C. Lalrinzuala

5 Lalbiakzuala

6 R. Lalrinpuia

7 Lalmawizuala Colney

8 Joseph Lalṭhafela

9 Larry Lalrinawma (Captain)

10 Lalsangzuala

11 Laldawngliana Colney

12 R. Lalhriatzuala

13 Laldinpuia

14 Anthony Vanlalfela

15 R. Lalnunmawia

16 Lalramdinsanga Ralte

Coach : Vanromawia (Vr-a).