Goa-ah Aizawl FC an comeback

Pathianni tlai I League inkhelah Salgaocar-in minute 90 a nih hnuah pawh Aizawl FC lakah goal khatin hma an hruai a, injury time-ah tlawm duh lo MPL champion-in R. Malsawmtluanga penalty hmangin an sut.

Aizawl FC-in Goa-ah point khat hlu bik an hlawh chhuak a, an elpui Salgaocar an draw avangin tun dinhmunah chuan relegate an hlat sawt. MPL champion hi chak zo ta lo se chuan Salgaocar nen an point hmuh zat inang ang a, head to head en tur a nih avangin Aizawl FC hnuaiah tla thei lo DSK Shivajians chiah an awm ang.

Starting XI-ah Yonezawa

Aizawl FC boss Manuel Retamero-a'n Spoting Clube de Goa hneh lo team aṭangin player pali a thlak a; keeper Zothanmawia, captain David Lalrinmuana, Brandon VL Remdika leh Alfred Kemah Jaryan aiah Manipuri keeper Soram Poirei, R. Malsawmtluanga, H. Lalbiakthanga leh Atsushi Yonezawa te a luhtir a. Japanese forward Atsushi hian a vawi khatna atan starting eleven a chang.

Salgaocar-in an match hmasa paliah an khingpui an hneh loh vek avangin an Scottish coach Malky Thomson an ban a, a aia an lakluh chu season liam taa Royal Wahingdoh pathumna nihpuitu Santosh Kashyap a ni.

Kum 49-a upa Kashyap hian ISL champion Chennaiyin aṭanga an hawh Brazilian defender Eder Monteiro chu starting eleven-ah a dah a, India international keeper Karanjit Singh leh season liam ta I League best player Jackichand Singh-ten bul an ṭan bawk.

Duffy goal

Aizawl FC-in ṭum dang ang bawkin passing game nen bul an ṭan a, Lalramchullova hmangin second 10-na lekah goal an khung nghal teuh hle.

Goan club-in awmze neiin an nawr let a, Jacki­chand Singh leh Darryl Duffy te intlawpin Aizawl FC tlarhnung an ṭhiat a, Manipuri winger pet chu Aizawl FC keeper Poirei-a'n ṭha takin a dang.

Aizawl FC chungnung hret mah se goal khung an harsat a, minute 42-naa MPL4 top scorer F. Lal­rinpuia pet chu goal pawnah chiah a kal a. Minute hnih hnuah foreign player ṭha danglamna a lang a, defender Gurjinder Kumar pass chu Scottish forward Duffy-a'n hmahruaina goal-ah chantirin first half-ah goal dang a luh belh lo.

Goal venhim

Aizawl FC lamin goal khung tumin Japanese forward Atsushi aiah Brandon-a an luhtir a, Salgaocar-in goal venhim an tum bawk nen an nawr na sawt.

Brandon-a'n goal a ken tel mai loh avangin Spanish coach-in Alfred leh David te a luhtir zui bawk. Aizawl FC player-te'n half chance bak an insiam thei lo a, Punjabi keeper Karanjit Singh tan dan harsa tur a awm lo.

Hun tawp lamah Aizawl FC goal khung tum luatah mualneitu Salgoacar-in goal khung belh theihna tur hun ṭha a nei a, substitute Gilbert Oliveira-a'n minute hnihna lekah goal khung ngei ngeina tur hun ṭha a hlah.

Injury time-ah Liberian forward Alfred-a'n Salgaocar defender Reagan Singh lakah penalty a hlawh chhuak a, MS-a'n cool takin goal-ah a chantir. Darlawn midfieler MS-a'n MPL3 final-ah penalty vawi hnih a khung tawh a, penalty hmang bawkin tun season I League-a Mizo goal khung hmasa ber a ni.

Hmabak

Salgaocar-in coach thar Kashyap-a hnuaiah point an hmu a, point thum an hmu lo erawh an ui khawp ang. Goan club hian February 11-ah Sporting Clube de Goa an hmachhawn ang.

Aizawl FC-in Goa khaw lum hnuaiah point an hlawh chhuak a, February 5, Zirtawpni tlai dar 4:30 hian Kolkata-ah East Bengal an lenchilh ang.

Lajong an chak

Shillong Lajong-in an khelmualah team ṭha an ni tih an lantir zel a, nimin tlai vek khan Sporting Clube de Goa chu Brazilian forward Uilliams goal hmangin 1-0 in an hneh.

Shillong club hian khualmualah Bengaluru 3-0 laiin hneh lo mah se an mualah erawh Mumbai FC draw in bul an ṭan a, Goan club pahnih Salgaocar leh Sporting Goa te an hneh.