Chelsea-ah Alexandre Pato a lut chiang ta

Hun rei tak sawizawm an nih hnuah Brazilian striker Alexandre Pato chuan Chelsea a zawm ta a, Stamford Bridge-ah hian season tawp thleng loan-a khel turin contract a ziak a ni.

Kum 26-a upa striker chuan, "Chelsea tana ka khel thei tur hi ka lawm hle a, ka tan chuan mumang ang mai a ni. Ka team-mate tharte hriat thuai thuaia inkhelh hlan ka nghakhlel a ni. Chelsea hnenah lawmthu ka sawi a, mi an rinna hi khelmual chhungah chhanlet ka tum ang," tiin Blues tan ṭha taka khelh a tum thu a sawi.

Chelsea manager lailawk Guus Hiddink chuan, "Pato hi Premier League-ah ṭha taka a khelh theih dawn leh dawn loh hriat nan loan-in kan la phawt a, hlauhthawn tur a ni lo," tiin hliam vanga beisei phak lo Pato an lakluh chhan a sawi fiah.

Blues hian Pato bakah USA defender Matt Miazga chu New York Red Bulls aṭangin an la lut bawk a, kum 20-a upa defender hian kum li leh a chanve London club tana khel tur hian contract a ziak a ni.

USA tana vawi khat inlan tawh defender chuan, "Chelsea hi hma ka sawn theihna tura hmun pawimawh tak a ni a, khawvela player ṭha ber berte hnuaiah ka inzir thei dawn a ni," tiin Chelsea a zawm chhan a sawi.