Arsenal tan Sanchez a lo kir

Alexis Sanchez chuan No-vember thla hnua a vawi khat nan Arsenal tan inkhel bul a ṭan a, Inrinni zan khan Emirates Stadium-ah Burnley lakah chakna goal khungin a team chu FA Cup fifth round a hruai thleng.

Gunners manager Arsene Wenger-a'n kar hmasa a Chelsea hneh lotu player pakua ngawt a siksawi a, first half-ah Arsenal tana defender Calum Chambers goal hmahruai khung chu Burnley tan Sam Voke-a'n sut ve mah se second half-ah Chile international Sanchez chuan chakna goal a khung.

Inkhel bul ṭan-tu zing-ah Arsenal mid-fielder Mohamed Elneny a langsar a, tun thla tira Basel aṭanga pound mak-taduai 5-a an lakluh Egypt international hian khelmual chhungah tharum a ngah zia leh ball a pass thiam zia a pholang. Minute 90 chhungin ball vawi 100 a pass hman a, heng zinga 96% zet chu a dik a ni.

Competitive game-a vawi 1100 North London club enkawl tling chiahtu Wenger chuan, "Elneny kha inkhel bul ṭan tirh lam kha chuan a fimkhur lutuk hret a, a hnuah kha chuan a khel ṭha tak zet. Insiamrem tur chuan hun a la mamawh deuh mai thei a, mahse a thiamna leh theihna kha chu a ṭha tawk a ni," tiin a player thar khelh danah a lungawi hle.

Khawvela knockout foot-ball inelna upa ber FA Cup-ah hian Arsenal hi champion lai an ni a, he inelnaah hian vawi 12 champion tawhin anni aia record nei ṭha an awm lo.