India tan buaina tur a awm lo

Lalremsiami Hmar telna India hmeichhe hockey team chuan an hmaa ding an sawp zel. Asian Games 2023 khelh laiah nimin tlai khan India hian Malaysia chu 6-0 in an sawp - Mizo nula Siami'n goal khat a khung.

Hangzhou, China-a inelna neihah India hian bul an ṭan fuh hle a, minute sarihna lek aṭangin goal an khung ṭan nghal a, a khat mawi tawkin an khung chhunzawm deuh reng.

Hockey inelnaah hian quarter li an khel a, quarter khat hi minute 15 zel a ni. Quarter hnihna an khelh zawh chuan India hian 4-0 in hma an hruai tawh a, chawlhlawk hman meuh chuan chak zawk tur a chiang der tawh.

India hian an match hmasa zawkah Singapore chu 13-0 tehmeuhin an lo sawp tawh bawk a, match hnih an khelh tawh chinah goal 19 khungin anmahni lamah a la lut ve miah lo thung.

Kolasib nula Remsiami hi forward ni mah se ball semtu atan hman a ni ṭhin a, team ṭhatna turin pawh hnun hret a ni. Goal khung tam lo mah se team tha tichaktu pawimawh a ni.

Malaysia nulate hian India team hi an ngam ngai lo, ram pahnih hi vawi 18 an inhmachhawn tling ta chiah. India hi vawi 17 an chak thei, ṭum khat chu an inhnehtawk thung - Malaysia hian India lakah chak ni hmel an la hmu lo tihna a ni.

Inelna neih ṭan hma khan Mizo nula Remsiami chuan, "Kan game pangngai ang tak kan khel thei a nih chuan gold medal lak kan beisei," tiin inringtawk takin Vanglaini a lo hrilh tawh, a sawi ang ngeiin India an chungnung rih hle.

India hian a pool match pathumna atan vawiin chawhnu dar 1:30 hian South Korea an hmachhawn leh dawn a, chumi hnuah Hong Kong nen an la intum leh ang.

Asia ramte inelna lianah hian nimin tlai thleng khan India chuan gold medal pariat a la tawh a, silver medal leh bronze medal 12 ve ve nen a pumpuiah medal 32 a la tawh.

Inelna thlengtu leh hmahruaitu ni bawk China chuan medal 184 tehmeuh a la tawh a, gold medal a lak ringawt pawh 98 a tling tawh. India chungah hian China bakah - South Korea leh Japan te an awm.