Man United an nui leh ṭan

Manchester United-in chak hmel an hmu leh ṭan a, zanin dar 7:30 hian Carabao Cup-a an hneh zawh hlim Crystal Palace nen Premier League-ah an inkhel lehnghal dawn. Inkhelhna hmun tur hi Old Trafford a nih avangin Erik Ten Hag-a hote hi point thumah chauh an lungawi ang.

Old Trafford-ah Man United hi Brighton lakah chesual zauh mah se an mualah hian record an nei ṭha a, an match khelh leh tura match hmasa pasarih zinga paruk hi an muala an khelh dawn avangin hmabak a êng hle.

Eagles an hneh ṭumin league match-a Burnley hnehtu aṭangin player pasarih an thlak a, tun ṭumah hian engzat tak siksawi ang maw? Andre Onana erawh khawih chet a rem dawn lo a, Cameroon keeper hian match hnih a zawnin a clean sheet tawh.

Player thar Sofyan Amrabat-a'n mual vei lamah hming a chher nghal a, Sergio Reguilon a la damloh chuan Amrabat bawk a inlan a rinawm. Tlarhmaah Anthony Martial-a'n goal khung mah se Rasmus Hojlund a awm avangin French forward tan bul ṭan nawn a harsa dawn.

Man Untied player an dam chho ṭan a, Mason Mount-a'n midfield-ah hmun pawimawh a chan chhoh a rinawm. Chutihrualin Lisandro Martinez dinhmun a la chiang lo a, Aaron Wan-Bissaka, Luke Shaw, Tyrell Malacia, Kobbie Mainoo, Amad, Antony leh Jadon Sancho te an khelh theih a la rinawm loh. Chumi awmzia chu Ten Hag-a'n duh thalin player a la siksawi thei lo tihna a ni.

Crystal Palace pawh an dam kim bik lo - James Tomkins, Nathan Ferguson, Matheus Franca, Jefferson Lerma leh Michael Olise te an la inlan thei dawn lo. Odsonne Edouard, Naouirou Ahamada leh Jairo Riedewald te dinhmun a chiang lo bawk.