Manchester City damdawi in a lun

League Cup aṭanga Newcastle United-in an petchhuah hlim Manchester City chuan zanin dar 7:30 hian league match khel turin Wolverhampton Wanderers an lenchilh dawn a, mahse, Pep Guardiola team hi hliam neih ngah avangin an la buai rih hle.

Chutihrual chuan Bernardo Silva leh John Stones te chu an lo kir hnai tawh niin khawthlang media-te chuan an tarlang a, zaninah Wolves an hmachhawn thei ang em, tih erawh he thu buatsaih a nih lai hian kan hre hman lo.

City tan Kevin de Bruyne chu inlan thei lo tur chiang a ni a, Nottingham Forest laka hnawhchhuah Rodri chu match thum atan hrem a nih avangin a inlan thei dawn lo bawk.

Pep-a team hian league match rukah hnehna la chang vekin, hma an hruai mek a, mahse, player inhliam leh hrem piahlamah, an match hnuhnung berah Magpies-in 1-0 a an hneh avangin an inkhel tur hian ngaihven a hlawh hle.