MPL club-te chungah kan lawm - Mizoram manager

Santosh Trophy khel tur Mizoram team chuan September 27, Nilaini aṭang khan coach Lalsangzuala Hmar hnuaiah training an ṭan. Nimin khan a ni thum nan training an nei a, inpuahchahna hun tlem mah se player fitness a ṭha sa thung.

Mizoram manager K. Lalenghluna (Maenga) chuan, "October 10 hian Punjab panin kan kal mai dawn. Inpuahchahna hun a rei lo hle. Chutihrualin MPL club-te zarah player fitness ṭha leh inkhel tura inpeih kan nei a, an chungah kan lawm hle. Club hruaitute leh coach-te thawhrimna hi Mizo mipuite pawhin kan hriat ve a ṭul a ni," tiin Vanglaini a hrilh.

Mizoram hian match hmasa berah champion rinkai zinga mi Services an hmachhawn nghal dawn a, hmabak a harsa dawn. Manager Maenga chuan, "Hmabak a la hautak hle. Tun hnaiah mit na hri a leng a, heng hri leng leh damlohna laka kan fimhlim theih nan Mizo mipuite ṭawngṭaipuina kan ngen a ni," tiin Vanglaini a hrilh a, Mizoram tan theihtawp an chhuah tur thu a sawi bawk.

Mizoram hian October 10, Thawhlehni hian inelna neihna tur Amritsar Punjab an pan ang.