Naupang League chhunzawm dawn

Reliance Foundation Young Champs leh Mizoram Football Association buatsaih ‘RFYC Naupang League 2023-24 Season' chu September thlatir aṭang khan ṭan a ni leh tawh a, vawiin hian RG Stadium-ah matchday 3 khelh a ni dawn.

Reliance lama hotu Robert Roelofsen (Head of Youth Development), Stephen Charles (Head of Scouting) leh Nihal Colaco (Lead - Content) ten an awmpui mek a, anni bakah hian FSDL Grassroots Technical Director Richard Hood-a'n a telpui bawk dawn. Aizawlah hian team 14 an awm a, team tin hian category panga - Under 6, Under 8, Under 10, Under 12 leh Under 14 an nei vek.

Inelna hi league hmanga khelh a ni a, school chawlh hunaah an khel ṭhin. Reliance hian a thlawn vekin team telte hi jersey, mawza, tui bottle leh bag an pe a, inelna ṭha tak an buatsaihsak a; football hmasawnna piah lamah naupang hriselna atan a ṭha hle.