Spurs vs Liverpool - football an khel dawn e!

Liverpool boss Jurgen Klopp chuan, "Team pahnihin football kan khel dawn," a ti a, zanin dar 10:00-a Tottenham Hotspur-in league match khel tura a team Liverpool an lo mikhual tur chu a thlirlawk.

Football khawvelah team tinin khelh dan phung an nei a, mipui tana ennawm chhawp lem loa hnehna chan chu coach tam takin an pawisa lo - Klopp leh Spurs boss Ange Postecoglou erawh an ni ve lo.

Coach pahnih hian attacking football khelh an duh ṭhin a, hei vang hian Klopp pawhin, "Football kan khel dawn," a tih hian goal khung tumin an innawr dawn a tihna a ni - inṭhuthmun te siamrem ula, inkhel hmuhnawm en turin inpeih rawh u le!

Premier League-ah team pahnihin match ruk an khel tawh ve ve a, an la tlawm lo ve ve - mahse, Spurs hian vawi hnih draw an neih avangin Reds hi point hnihin an phak lo a, zaninah an inkar zauna hi chinfel an duh ang.

Fiahna

Klopp chuan zanin an inkhel tur chu team pahnih tan fiahna a nih tur thu a sawi. German coach chuan, "Fiahna hautak a ni dawn a, chutihrual chuan engtiklai khan nge awlsam taka game kan khelh tak pawh ka hre lo.

"Newcastle leh Chelsea hmachhawnte kha a harsa êm êm a, khualmual match a nih hi chuan a harsa viau zel - kan mualah lah a awlsam sawt chuang si lo! Tottenham pawhin season ṭha tak an hmang a, Ange hi coach ṭha tak a ni tih ka hre bawk.

"Ani nena intawn hi ka nghakhlel tawh a ni. A hunlaia Celtic inkhel in en chuan coach ṭha a nihzia inhmu ang. Harry Kane-a chhuah kumah heti taka game ṭha hi a khel thei a, keini tan leh anni tan pawh zanin hi fiahna a ni ang," a ti.

Liverpool hian league match hmasa berah Chelsea (1-1) an draw a, a hnuah league match nga a zawnin an chak. Mahse, an hmachhawn zingah Chelsea leh Newcastle chu team langsar tia chhal theih an ni deuh mai a, zanina Spurs an tawn tur hi an tan fiahna a ni dawn.

Fimkhur a ngai

Liverpool-in tun season inelna hrang hrangah match riat khel tawhin, match ruk an chak a, match khat an draw. Mahse, he team hian match rukah goal an chhuah hmasa vek a, Liverpool fans tan thlamuang taka inkhel en a harsa ṭhin.

Zanina an hmachhawn tur hi Spurs an ni tawh a, goal an chuuah hmasa leh a nih ngat chuan 'comeback' a harsa tawh dawn. Chuvang chuan Klopp-a tan tlarhnung remphui dan ngaihtuah hmasak a ṭul a, midfield aṭanga a ṭan a ṭul.

Liverpool tana thu lawmawm chu Trent Alexander-Arnold-a'n training a zawm leh tawh a, Virgil van Dijk, Ibrahima Konaté leh Andy Robertson te nen an inkawp thei ang - Klopp-a'n tlarhnung pui tur atana a hman ṭhin Alexis Mac Allister hi ball pet thiam viau mah se number 6 tur chuan a tharum tawk lo.

Chuti a nih chuan Klopp-a tan Wataru Endo chunga rinna nghah a hun tawh mai lo maw, tiin inzawh theih a ni a, Japanese midfielder hian Leicester City lakah a theihna a lo pholang tawh - midfield-ah Dominik Szoboszlai leh Mac Allister nen an inkawp lo ang tih a sawi theih loh.

Salah vs Son

Liverpool-in tlarhma an neih ṭhatzia inhrilh nawn a ngai lo. Mohamed Salah a la thiam reng a, Darwin Nunez a 'form' em em a, Cody Gakpo, Luis Diaz leh Diogo Jota an la awm cheu bawk - Spurs tlarhnung tan hmachhawn an châkawm lo ang.

Reds hian league match ruk aṭangin goal 15 ngawt an khung tawh a, chutihrual chuan Spurs hian goal 15 an khung ve tawh tho tih hriat a ṭha. Klopp-a sawi angin team pahnih hi goal khung tumin an innawr dawn a, attacking game khel turin player an nei ṭha tawk bawk.

Kane awm loh hnua zo taka a mawhphurhna latu Son Heung-min hian league-ah goal nga a khung leh der tawh a, South Korean forward thlawp tura James Maddison leh Dejan Kulusevski an la awm cheu bawk avangin Liverpool hneh turin an ṭha tawk.

Spurs hian tun season-ah Liverpool aiin match an khel hautak tawh zawk, tiin a sawi theih a, he team hian Manchester United (2-0) hneh tawhin, Arsenal chu khualmualah 2-2 in an draw bawk - mahni muala Liverpool hneh loh an duh lo ang.