ISL-ah Jerry Mawia a mawi leh ta!

Ningani zan khan Indian Super League inkhelah Jerry Mawihmingthanga'n goal a khung leh ta a, tun season ISL match hnih a khelh tawhah goal a la khung ve ve - Chanmari tlangval tan lawm erawh a kim lo a, Mumbai City lakah a team Odisha FC chu hnehna a chanpui zo chuang lo.

Kalinga Stadium, Bhubaneswar-a inkhelah Odisha tan Jerry bakah Roy Krishna (penalty) ten goal khungin vawi hnih ngawt an team hma an hruaipui a, mahse, Mumbai hian Rostyn Griffiths leh Jorge Pereyra Díaz hmangin an chhanglet a, 2-2 in inkhel a tawp.

Mizo tamna

Odisha-in Mizo player pakua ngawt an kawl a, ISL club-ah chuan Mizoram player kawl hnem ber an ni. Mumbai lakah pawh Jerry Lalrinzuala, Isak Vanlalruatfela, K. Lalṭhathanga (Puitea) leh Jerry Mawihmingthanga ten inkhel bul an ṭan vek - bench aṭangin Laldinliana Renthlei a lut bawk.

Mumbai lamin Lallianzuala Chhangte leh Lalengmawia Ralte (Apuia) an kawl bawk a, Ningani zan ISL match-ah Mizo pasarih ngawtin khelmual an lut tihna a ni.

A hming Jerry

Odisha hian first half hun pek belhah goal hmahruai an khung a, a khungtu chu Jerry a ni - Isak Vanlalruatfela ball thlawh luh chu Jerry hian um lutin Akash Mishra chuan a awma lo la thlain, keeper Mohammad Nawaz chuan a lo man.

Mahse, Nawaz hian a man nghet tawk lo a, beidawng loa umtu Jerry chuan chuhsakin goal-ah a chantir zui - Jerry hian 2-0 a Chennaiyin an hneh ṭumin goal hmahruai a lo khung tawh bawk.

Inkhel hmuhnawm

Mumbai an beidawng duh bik lo - Rostyn Griffiths chuan minute 47-naah si phurh an rawn sut. Mahse, minute 75-naah keeper Nawaz bawk a chesual nawn a, Roy Krishna a tihtluk avangin penalty a chawi - tawnhriat nei ṭha Krishna hian goal-ah a chantir zui.

Mahse, hei hi a tawpna mai a ni lo. Argentine striker Jorge Pereyra Díaz chuan tlawm bik an duh lo tih pholangin minute 88-naah a khung ve leh a, 2-2 in inkhel a tawp.

Jerry-a beiseina

ISL match hnihah goal hnih a khung ta der a, Jerry Mawia chuan, "Pathian zarah ka vannei ve leh ṭhin a ni. Chutihrual chuan season chawlh laiin theihtawp ka chhuah a, inpuahchahna ṭha tak nen season ka hmachhawn a ni," tiin Vanglaini a hrilh.

Jerry chuan sawi zawmin, "Pathian zarah inhliam loa season hman tluan theih hram ka beisei a, theihtawp ka chhuah zel ang a, kan thlen chin chu Pathian thu thu a ni," a ti a, beiseina sang tak a neih thu a sawi.