Mi thar ang mai ka ni - Smith Rowe

Emile Smith Rowe chuan Arsenal tana inkhel bul a ṭan leh ta chu a mak zawk hial tih a sawi a, a tan thil engkim mai chu a thar vek ni maia a hriat thu a sawi.

Hale End aṭanga inzir chhuak a ni a, theihna nei sang leh beiseiawm zinga mi a ni. Mahse, hliamin a tlakbuak nasa a, hliam a neih ngun chhan hi a vanduai bakah khawsak phung dik tawk lo vang nia sawi pawh an awm.

A dam ṭha a nih chuan Mikel Arteta-a'n chhawr a hreh lo, tun hma pawhin a club tan hmun pawimawh a chang ṭhin. Brentford nen League Cup an khelh ṭum khan a tir aṭangin a inlan.

Ni 499 hnuah Arsenal tan inkhel bul a ṭan ve leh chauh tihna a ni. Kum 2022 May 16 khan Newcastle nen Premier League an khelh ṭumin bul a ṭan, tunah a chhunzawm ve leh chiah.

Kum 23 mi Smith Rowe chuan, "Ka rilru puthmang ka thlak tawh, inkhel mumal loa rei tak awm chuan inrintawk a harsain rilru pawh a hnual duh hle a, tunah erawh hmalam pana kal chauh ka rilruah a awm.

"Rinhlelhna leh hlauhthawnna tam takin min tlakbuak a, chung karah pawh chuan min thlawp tlattu ṭhian ka nei a, fans lamin ka lakah beisei an nei reng bawk, chu chuan chakna min siamsak," a ti.

Champions League-ah pawh Smith Rowe hi bench aṭanga luhtir a ni a, Emirates Stadium chhunga inkhel entute thawm a ring hle. Arteta chuan a player hi club tana hlu danglam leh pawimawh a nih thu a sawi chhuak hial.

Gunners tana a khelh ṭhat lai chuan England tana khel tur pawhin koh a ni hman, tunah erawh a bul aṭanga a ṭan ṭhat leh a ngai dawn, theihna a neih bakah a kum a la tam loh avangin indinthar turin hun a la nei.

A dam ṭha a nih pawhin Arsenal tana hmun nghet chan nghal mai erawh a awlsam dawn lo. Tlarhma lam sirah Gabriel Martinelli leh Leandro Trossard te nen an inel a ngai dawn.

Smith Rowe hi a laiah pawh a khel thei, chutihrualin a khelh dan phungah Martin Odegaard a el phak a ngai dawn a, captain bakah hian man tam taka an lei Kai Havertz an la nei bawk, coach Arteta lungtiawitu nih tumin an inel ang.

North London club hian zanin dar 7:30 hian Premier League khel turin Bournemouth an lenchilh dawn, kar laihawlah Lens nen Champions League an khelh dawn bawk avangin player an insiksawi deuh a rinawm.