A hun a thleng dawn ta - Part I
Cricket tui mite nghahfak, kum li dana rawn inher chhuak ṭhin. ICC Cricket World Cup chu, a thu mai ni tawh loin, tisaah a rawn chang dawn ta. Karleh lamah thla a lo thar ang a, Khuangchawi thla ni 5, Ningani ni bawk a rawn inherchhuah chuan, infiamna khawvel chu Ahmedabad khuaa Modi Stadium lam an hawi tawh ang.
2023 Cricket World Cup khuh hawng turin, World Cup hnuhnung bera final hmuhnawm zeta intumte champion lai England leh pahnihna New Zealand lamah mit a fu ṭhup mai dawn a ni. World Cup final hi October 5-ah ṭan a ni ang a, November 19, 2023-ah khelh zawh a ni dawn.
Khaw lum leh Pitch
Favang rim nam ṭan deuh mah se, India ramah hi chuan Khuangchawi Thla hi zawng khua a la lum em em mai a, hemi hun lai hian World Cup League Stage khelh a ni dawn. Inkhel a tam dawn a, khua a lum tel dawn avangin players ho fitness leh taksa lamah engmaw chen chu nghawng a nei ngei dawn tih a chiang a ni.
Tin, October-November hi India rama tlai thim hlima dai tlâk nasat hun a ni dawn a, hei hian 2021-a UAE-in T20 World Cup an thlen ṭum khan harsatna namen lo a thlen. Captain ṭhumvawr a chak apiangin vuak hnuhnun an thlang ṭhin, a chhan chu dai tlâk hnua ball vawm tute tan ball huh leh nal a vawm a harsat tawh ṭhin vang a ni. Ṭhumvawra chak kha, inkhela chak zuina ang hialah a ngaih theih.
Kuminah erawh ICC lamin ground 10 an hman tura curator-te chu, Indian pitch kan lo hmuh ṭhin ang lo takin, hnim hring mawi tawk tak an ṭo tir vek tur a ni tih thu an chhuah. Hei hian fast bowler ho nasa takin a pui dawn a, dai pawh tla mah se bat leh ball contest rualkhai a awmna theihna atan a ni. Thuchhuah ṭha takah a ngaih theih.
Tin, India ram khelmual ho hi a nawlpuiin a zau lo tlangpui a, ICC-in boundary minimum a tuk meter 65 chu, meter 70 tal khelmual zim ber pawh a ni tur a ni a, inkhel apianga run 300 chuang, batsman ho in show-na ringawt ni bik lovin, bowler leh batsman-te contest hmuhnawm tak a awm theih nan thu an chhuah bawk. Eng tak ang maw?
BCCI luihaina
Kum 2011 aṭanga World Cup pathum kan hmuh tawhah a thlengtu branch-te an la champion zel. Kum 2011-ah a thlengtu pathum India, Sri Lanka leh Bangaldesh zinga mi India an champion a, kum 2015-ah Australia leh New Zealand ten thlengin final an intum hial. Australia an chak ta zawk. Kum 2019-ah England leh Wales ten an thleng a, England an champion leh bawk.
Kuminah hian rin kai ber leh thlengtu Hamara Desh hi an champion loh vaih chuan BCCI chunga India mipui lungawi lohna hi a nasa ve khawp ang. Chu chu hre rengin, India aiawh tur player 15 pawh ICC-in tih chian hun atana a ruat nimin piah September 28, Nilaini thleng khan Ajit Agarkar leh a hote an la buai nih kha. Player ṭha hlir 20 rual vel - ram dang team-ah chuan khel pha deuh vek tur zinga tu nge thlan loh leh thlan tura buaia luhai hi thil namai lo tak a nih a rinawm.
Ashwin, Axar, Washington & Samson
A tira World Cup Squad puan hmasak bera tel Axar Patel chu, Asia Cup-a a malpui tihnat dam hman ta lo. Hei vang hian kum li zet ODI khel tawh lo, Test-ah erawh India innghahna kulhpui Ravichandran Ashwin a vanneih phah. Ashwin hian Australia lakah lo khel ṭha bawk nen, last minute ticket a hmuh phah ta.
Washington Sunder erawh batsmanṭtha zawk ni mahse, a vawm lamah a senior Ashwin a hi tawnhriat a nghah zawk avangin a vannei ta kan tilo thei lo. Selector-ten Sanju Samson an virkual tir dan erawh article hranga ziah tham a ni thung. Sanju Samson nih hi tun dinhmunah chuan tumahin an châk awm lo e.
Silly Point hmasa lama kan lo thailan angin, Ashwin-a tel hian spinner pathum pathum veivawm vek awm tur aiah, variety a rawn siam belh. Tin, Test-ah phei chuan century lo siam nual tawh a ni nen, number 8-a bat tura duhthusam a ni. Chutirualin Axar Patel erawh a vanduai kan ti mai ni ang chu. Famkim vek thei ni hek suh, ṭhenkhat tan lungngaihna hi, ṭhenkhat tan malsawmna nih a ngai si ṭhin nih hi maw.
India World Cup squad:
Rohit Sharma (c),
Hardik Pandya (vc),
Shubman Gill, Virat Kohli, Shreyas Iyer, KL Rahul, Ravindra Jadeja, Shardul Thakur, Jasprit Bumrah, Mohammed Siraj, Kuldeep Yadav, Mohammed Shami, Ravichandran Ashwin Ishan Kishan, Suryakumar Yadav.