La Liga hmahruaitu Girona khelmualah Real

Spanish top flight league hmahruai mektu chu Real Madrid an ni lo a, champion lai Barcelona pawh an ni lo - Atletico Madrid pawh an ni chuang lo a, i hriat ngai vak loh Girona an ni daih!

La Liga match sarih khelh tawhah Girona hian tlawm an la nei miah lo a, match hmasa bera an draw hnuin match ruk chhung chu a zawnin an chak tawh - zanin dar 10:00 hian Real Madrid an mikhual dawn.

Real hi league match sarih khelh tawhah vawi khat an tlawm tawh thung a, zanina an lenchilh tur Girona ai hian point khat chuahin an hniam zawk - a chak zawkin league table chung ber an luah zui ang.

Hriat ngai loh

Girona hi mi tam zawkin an hre lo ang - season hmasa khan 10-na ni chungin season an khar a, an tan chuan season ṭha bik a ni. Mahse, an midfielder pawimawh Oriol Romeu chu Barca-in euro maktaduai 3.5-in an chhuhsak a, season hmasaa club top scorer Taty Castellanos, winger ṭha Rodrigo Riquelme leh centre back pawimawh Santi Bueno ten an chhuahsan bawk.

Nipui lai khan player paruk an la lut ve a, mahse, heng zinga pahnih hi loan-a an hawh niin, pakhat chu free transfer-in an la a, pathum lei nan sum an seng ve. La Liga chuan an club sum dinhmunte thlirin, kum khatah hlawh atan €51.98mtd aia tam sen an phalsak lo.

Zanina an hmachhawn tur Real erawhin kum khat chhungin hlawh atan €727.45mtd an hman a rem thung - hei ringawt pawh hian team pahnih inthlauhzia a hrilhfiah a, zaninah league hmahruaitu nih inchuhin an inkhel dawn!

Tute nge?

Tun season-a Girona chet ṭhat nan winger Viktor Tsyhankov chu player lansgar zinga mi a ni a, kum 19 mi, Ligue 1 club Troyes aṭanga loan-a an hawh Savinho pawh sawi a ngai - match sarihah goal hnih leh assist pali a nei der tawh a, a khel a hmuhnawm ṭhin takzet.

Captain Cristhian Stuani hi sawi hmaih a thiang lo - Girona tan match 218-a goal 118 khung tawh a ni a, segunda lama season thum zet hun an hman lai pawha phatsan duh lotu a ni. League match sariha goal thum leh assist vawi hnih nei tawh Artem Dovbyk pawh sawi hmaih a thiang lo.

Dutch defender tawnhriat nei ṭha Daley Blind chu nipui transfer-ah an la lut bawk a, kum 22 mi defender Eric García chu Barcelona aṭangin loan-in an hawh bawk. He team hian Real hneh turin theihna an nei a, inrintawkna nen an lo mikhual ang.

Real lam

La Liga match hmasa pangaah Real an chak vek a, mahse, Madrid derby-a Atletico Madrid an tawn meuh chuan an zawr hneh hle - an hmelma club lakah 3-1 in an tlawm a, mualpho tak chungin an haw.

Mahse, Real hi match hnihnaah insiamṭha lehnghalin, 2-0 in Las Palmas an hneh zui a, an indahṭha ṭhen mah mah - chawlh hahdamtir zinga mi Jude Bellingham leh Luka Modric pawh an lo kir leh tawh tura ngaih a ni.

Team pahnih squad hi khaikhin chi a ni lo a, chutihrual chuan Girona hian an kaltluan em avangin inrintawkna an nei ang - zaninah inkhel hmuhnawm en turin inpuahchah rawh.