Napoli an insawifiah

Victor Osimhen laka an thil tih chungchangah Napoli an insawifiah a, mahse an player ṭha bik lakah hian ngaihdam dilna thu erawh an sawi tel lo thung.

Napoli hian Bologna nen 0-0 a an inhnehtawk hnuah an striker Osimhen laka fiamthu thawhna chu social medai pakhat TikTok-ah an tarlang, he inkhelah hian Osimhen hian penalty a hlah a ni.

Italian champion chet danah Osimhen leh a agent an lawm lo a, social media lama Napoli leh a kaihhnawih thil a dah zawng zawng a dah bo nghal vek, heti chung hian Udinese nen an inkhelh ṭum chuan a inlan ta tho.

Napoli chuan thuchhuah siamin, "Napoli hian nipui lai khan Victor lei dilna tam tak kan dawng a, chungte chu kan hnawl vek. Hei hian club tana mipawimawh leh hlu a ni tih a lantir.

"Club chuan Victor Osimhen hi hrehawm tawrh tir emaw fiamthu thawh nan emawa hman a tum lo a, chu chu a thil tum pawh a ni lo. Social media hi chuan kalhmang dang a nei a, player tihnat tumna a awm lo," an ti.

Osimhen-a agent Roberto Calenda erawhin thil thlen tirh khan dan anga hma an lak tur thu a sawi tawh a, thu dang a la nei leh lo thung - club leh an player inkar hi ṭha tak a ni lo tih chu a hriat theih.

Season hmasa khan Nigerian international striker hian Serie A goal 26 a khung a, goal khung tam ber niin Naples club hi kum 33 hnua a vawi khat nan Italian champion a nihpui leh a ni.

European club lian tam takin lak tumin hel mah se a club ngaiah a cham tlang ta zawk a, tunah erawh a hma hun a ngaihtuah ṭha ngeiin a rinawm.

Serie A champion Napoli hian zanin dar 6:30 hian league match khel turin Lecce an lenchilh ang.