Bundesliga-ah Kane-a'n elpui a nei

Harry Kane-a'n a club thar Bayern Munich tan match nga lekah goal sarih a khung tawh a, a khung ṭha viau. Mahse, Bundesliga-a goal khung tam ber a ni rih lo. VfB Stuttgart forward Serhou Guirassy-a'n match nga thoah goal 10 a khung a, top scorer a ni mek.

England captain Kane-a'n Bundesliga top scorer ni turin elpui a nei a, hei hi amah tichaktu turah a ngaih theih zawk. League match 29 khelh tur a la awm a, Kane hian chawmtu a neih ṭhat bawk avangin Guirassy bakah goal ruk khung tawh Bayer Leverkusen forward Victor Boniface tan season tawp thlenga elpui a har dawn.

Mahse, zanina Bayern Munich khingpui tur erawh RB Leizpig an ni a, DFL Supercup-a an hneh loh kha an ni. Red Bull Arena Leipzig-ah zanin dar 10:00 hian an inkhel dawn a, German club lian lakah eng nge Kane-a an chiah hriat theih dawn a ni.

Kane hian Supercup-a Leipzig an hmachhawn ṭum khan minute 26 chhung khelin goal a khung loa, Borussia Mönchengladbach an hneh ṭumin a khung lo bawk. A bak inkhel dang panga, Champions League-a Manchester United an hneh telin goal a khung vek.

Bayern tana chanchin lawmawm chu Kane hian goal a khung ringawt lo a, a ṭhiante tan ball ṭha a pe thei. Tun season-ah Kane hian assist vawi thum a nei der tawh a, England captain awm hnu hian Bayern goal bawh a nat phah hle.

Season khata Bundesliga-a goal khung tam ber chu Robert Lewandowski a ni a, Lewy hian goal 41 khungin Bayern legend tho Gerd Muller-a'n goal 40 khungin a dawt bawk. Tuna Kane-a goal khung dan en chuan Lewy leh Muller te record pawh a him lo. Kane hi a inhliam lo a nih chuan Bundesliga top scorer tura ngaih a ni a, record a khum ang em tih hi mipui hriat châk a ni.

Bayern tan chanchin lawmawm a awm a, captain Manuel Neuer-a'n training a zawm leh tawh. Kum 37 mi Neuer hi thla 10 liam ta khan vur tawlhnaah a chesual a, a ke a tih tliah avangin tun thlengin a la inlan leh thei lo. RB Leizpig lakah Neuer hi a la khel thei lo a, chutihrualin Germany no. 1 keeper hi tun October thlaah chuan a inlan theih ngei a rinawm tawh.