Intlansiak tura ruahman a tam lutukah an ngai

Bike intlansiakna sang ber MotoGP season kal lai a la zo lo a, hetihlai hian season thara an kalphung tur an duang leh der tawh - Marc Marquez leh Fabio Quartararo te chuan intlansiak a tam lutukah an ngai.

Kuminah hian intlansiak vawi 20 a awm dawn a, chung zinga 13 chu an tlan tawh. Ruahman dan chuan November 26 hian a hmawr bawk nan Valencia Grand Prix tlan a ni ang.

MotoGP kalphung hi an thlak danglam tawh a, tun season aṭangin 'Sprint Race' an nei, intlansiak pangngai neih hma niah sprint race hi an tlan ṭhin, hetah hian point hmuh tur a awm nghal a ni.

Quartararo chuan, "Ruahmanna hi ka lo hria a, a nihna takah chuan intlansiak vawi 22 chauh ni loin sprint dang 22 a awm bawk, chuvangin a hautak dawn hle. Tun season pawh hi thlirkir ta ila, rider tam takin hliam an tuar.

"Zirtawpni aṭangin theihtawp chhuah ṭan a ngai a, a tuk ni hnih chhunga intlansiak hmachhawn leh chu a awlsam lo, tuna ruahman ang hi chuan hun a chepin a tepter dawn lutuk," tiin a sawi.

Repsol Honda rider, world champion vawi ruk ni tawh bawk Marquez pawhin Quartararo hi a thlawp a, tun season bikah pawh sprint race neih laia hliam an tam thu sawiin, intlansiak vawi 22 chu tam a ti takzet tih a sawi bawk.

Season kal laiah Francesco Bagnaia chuan point 292 hmuin rider championship lamah hma a hruai mek a, amah hnaih bertu Jorge Martin chuan point 279 a hmu thung.

Kar hmasa khan Indian Grand Prix tlan zawh niin, Pathianni chawhma dar 11:30 hian Japanese Grand Prix an tlan leh dawn a ni.