Saul Alvarez-a'n super middleweight title a hum

Saul 'Canelo' Alvarez-a'n Pathianni zing khan Jermell Charlo a hneh a, undisputed super-middleweight title a hum. Kum 33 mi Canelo hi unanimous decision-in a chak a, American boxer lakah judge pathumten (119-108, 118-109 leh 118-109) an chaktir vek.

T-Mobile Arena, Las Vegas-a an inhnek zawhah Canelo chuan, "Ka ṭha ber, tu nge kei aia ṭha. Tumahin Canelo an hneh thei lo," tiin a inhrosa a, Mexican boxer hi WBO, WBC, WBA leh IBF belt kawltu a ni.

Alvarez hian round sarihnaah Charlo hi a hnek tlu a, American boxer hi tho leh mah se chak phu zawk Mexican boxer-in hnehna a chang. Undisputed super-middleweight title kawltu Alvarez chuan, "Thla thum chhung chu chhungte bulah pawh awm loin tuna ka inhnek tur atan tlangah ka inbuatsaih. Boxing hi ka hmangaih a, boxing vangin tun hun hi ka thleng a, boxing hi ka nunah a pawimawh hle," tiin a sawi.