Man United an insiamṭha thei lo

Manchester United-in League Cup-ah Crystal Palace 3-0 a sawpin fourth round an lut a, Premier League-ah erawh result ṭhain a chhunzawm thei lo. Erik ten Hag-a hoten Eagles bawk hi Inrinni zan khan an mikhual a, 1-0 in an tlawm.

Palace hian Old Trafford-a point thum hlu tak an hlawhchhuah theih nan Joachim Andersen-a'n kawh zetin mawi zetin goal kilah a volley lut. Man United-in an chhanglet thei lo. Casemiro ball pet goal zawnah a kal lo a, Bruno Fernandes ball leh Rasmus Hojlund-a ball tauhte keeper Sam Johnstone-a'n a dansak.

Man United hi match sarih khelhah vawi li an chak tawh lo a, season la ṭan chauh mah se champion sawi rik ngam a harsa tawh dawn. Erik ten Hag chuan, "Vawi thum chiah kan khingpuite kha chance kan pe a, a vaiin set piece vek a ni. Keini lamin pet goal theihna chance kan nei a, kan tiṭha tawk lo. Goal hmaah kan ṭhat dan berin kan la khel chhuak lo a, thutlukna kan la siam dik lo a ni. Result ṭha nei tur chuan a hmawr bawk ṭhat a pawimawh," a ti.

Man United hian October 3, Thawhlehni zan hian UCL-ah Galatasaray an mikhual dawn a, October 7, Inrinni zanah Brentford an mikhual leh ang. Dutch manager Ten Hag-a'n pressure a nei ṭan a, pressure sut kian nan match hnih khelh tura chak hi a pawimawh hle.