Football nunrawnna temtu Liverpool!

Tottenham Hotspur leh Liverpool inkhelh zawhah Professional Game Match Officials Limited (PGMOL) lamin ngaihdam dilna an ti chhuak nghal a, Liverpool forward Luis Diaz-a goal khung pawmsak loh chu tihsual liau liau a nih thu an sawi.

Liverpool boss Jurgen Klopp-a'n, "Ngaihdam dil hian awmzia a nei lo a, point kan hlawh belh phah lo," tiin thinrim takin a chhanglet - hei hian Inrinni zana Spurs leh Reds inkhel boruak a hrilhfiah a, Liverpool-in football nunrawnna an tem.

Tottenham khelmualah Liverpool hi 2-1 in an tlawm a, Spurs tan Son Heung-min leh Joel Matip (own goal) ten goal an khung a, Liverpool tana Cody Gakpo goal khungin awmzia a nei phak lo.

Liverpool goal khung pawmsak an ni lo a, Curtis Jones leh Diogo Jota hnawhchhuah an ni bawk - vanduainain Liverpool lam a ṭang ta em ni chu aw, tih mai tur a ni a, tun season-a a vawi khat nan Liverpool an tlawm.

Vanduaina Part-I

Jurgen Klopp-a'n inkhelh hmain, "Team pahnihin football kan khel dawn," tiin a sawi lawk a, Tottenham nen attacking football khel ṭhin an nih avangin game hmuhnawm an phochhuah tur thu a sawi.

Inrinni zana team pahnih intawn hmain Liverpool hian an elpui langsar Manchester City tlawm thu an hria a, Spurs khelmualah hnehna an chan chuan league table chung ber an luah thei dawn tih pawh an hria a, an phur takzet.

Mahse, Curtis Jones chu Yves Bissouma laka a foul avangin minute 26-naah hnawhchhuah a ni a, rei pawh an inkhelh hmain Liverpool an kim lo nghal. Mahse, Reds an beidawng duh lo a, team huaisenzia pholangin chak an tum ngam.

Minute 34-naah Liverpool tan Diaz chuan goal a khung ta nge ngeah a inngai a, mahse, rei pawh a lawm hmain assistant refereein offside a phar tih a hmu a, a goal hi pawm a ni lo - video assistant referee (VAR) inrawlh mah se, pawm a ni chuang lo!

Vanduaina Part-II

Player pakhatin an tlem zawk a, an goal khung dik lo taka pawmsak an ni lo bawk. Heng zawng zawng a thlen hnuah hian Spurs tan Son Heung-min chuan goal ṭha zetin a khung a, Liverpool tan beisei a bo tawh, tiin a sawi theih.

Mahse, Liverpool-in an tha an thlah phah lo a, first half hun pek belhah Gakpo chuan ṭha zetin si phurh sutna goal a khung. Mahse, Dutch forward a inhliam zui a, second half-ah a inlan tawh lo.

Gakpo thlaktu chu Jota a ni a, mahse, Portuguese forward hian khelmualah rei hun a hmang hman lo. Minute 20 vel chauh khelmualah a awm tihin Jota hian a yellow card pahnihna a hmu fel der a, Jones khawhar hnem turin hnawhchhuah ve zui a ni.

1-1 a nihin Liverpool-in player pakuain an khel tawh a, Reds hian 5-3-0 formation ang hiala an khelh chang a awm. An ṭang tlang ngei dawn niin a lang a, mahse, hun pek belh minute ruknaah Matip chuan uiawm takin an lamah a tilut a, Spurs an chak - Liverpool tan Alisson a che ṭha a, lam hmaih a thiang lo.

Ngaihdam dilna

Inkhelh zawh veleh PGMOL chuan thuchhuah siam nghalin, Diaz-a goal khung pawm loh chu tihsual liau liau a nih thu an sawi. PGMOL chuan, "Tihsual chiang tak a awm tih kan hria a, PGMOL chuan kha thil thleng kha uluk takin kan zirchiang leh ang.

"Luis Diaz goal khung kha khelmuala awm match official-ten an pawm lo a, tihsual lian tak a nih avangin VAR a inrawlh ang a, goal-a pawm tur a ni. Mahse, VAR a inrawlh ta si lo a ni," an ti a, an inthiam lo hle.

Diaz-a offside hi VAR hmanga en chu a ni ngei a, mahse, ṭum danga tihlan ṭhin offside line graphic pawh tihlan a ni lo. Hei hi VAR lamin referee Simon Hooper chuan goal-ah a pawm tho nia an hriat vang a ni.

Mahse, Hooper hian goal-ah a lo pawm si lo a, VAR lamin an hrilh nawn leh tawh bawk si loh avangin dik lo takin thutlukna siam a ni - Liverpool tan a na.

Awmze nei lo

Liverpool hi an goal khung an pawmsak lo a ni mai lo a, player pahnih hnawhchhuah an ni bawk - PGMOL-in ngaihdam an dil zui a, mahse, a thleng tur ang a thlen vek tawh avangin Liverpool tan chuan thinrim belhchhahtu mai a ni.

Klopp chuan, "PGMOL thuchhuah siam kha sawi zui a ṭulna ka hre lo a, kan tan ṭangkaina a nei lo. Wolves pawhin Manchester United nen an inkhelh ṭuma thil thleng avangin ngaihdam dilna an dawng a, mahse, point an hmuh phah lo a, keini pawhin kan hmuh phah lo," a ti!

German coach chuan sawi zawmin, "Tumahin duh vang rengin thil an tisual lo a, mahse, a thleng miau si. Goal ṭha tak kan khung a, kan goal kha pawm ni ta se, game a inthlak ang em, ka sawi thei lo a, mahse, goal khung hian team chu min chakpui ṭhin chu a nia lawm," a ti a, a lawm thei lo.

Liverpool captain Virgil van Dijk chuan, "VAR chunga ka rinna hi ka hloh tawh a ni," a ti thlawt a, an elpui laka an goal khung pawm a ni lo chu a hrethiam lo - Liverpool fans tam takin Dutch defender lam an ṭang ang.