Man City an tawlhthlu, Laipui a puak

Premier League champion lai Manchester City-in Newcastle United hneh lo a, League Cup aṭanga an tlak hnuin September 30, Inrinni zan khan Wolverhampton lakah 2-1 in an tlawm. Pep Guardiola te hmabak chu season liam taa an elpui Arsenal an ni a, Gunners erawhin an khingpui Bournemouth 4-0 in an sawp.

Season liam taa Premier League nomawi inchuhtu pahnih City leh Gunners te hi October 8, Inrinni khian Emirates Stadium-ah an inkhel dawn. Hemi hma hian Champions League inkhel a awm dawn a, Gunners-in RC Lens an hmachhawn dawn laiin City erawhin an group-a ṭha ve ber RB Leizpig an tlawh dawn thung.

Rodri tel lohna

Man City-in Rodri tel loin Magpies an hneh lo a, Spanish midfielder hian match thum a khel thei dawn lo. Molineux Stadium-ah Erling Haaland khel thei mah se Rodri awm loh nghawng a lian zawk.

Minute 12-naah Pedro Neto-a'n chak takin mual dinglamah a khalhl lut a, Phil Foden-a'n a dan theih loh hnuah Nathan Ake-a'n a tackle hman lo. Neto hian box chhungah la lutin a cross ball chu Ruben Dias-a'n dang mah se a per chu goal-ah a lut.

Jeremy Doku te mual sirah hmuhnawm mah se goal khung a harsat a, Wolves tlarhnung an khawng ve tlat avangin City-in an ṭhiat hlei thei lo bawk.

Minute 58-naah Julian Alvarez-a'n box pawn chiah aṭangin freekick mawi zetin a khung a, City-in siphurh sutin an phur phah hle. Craig Dawson hoin Wolves tlarhnung Haaland an dah ṭha a, City meuh an hmachhawn chungin tlarhnung a phui ṭha.

Wolves zawkin goal an khung leh a, minute 66-naah Hwang Hee-chan-a'n goal zawna a pet vawi khatna khung lo mah se a per chu Matheus Cunha-a'n Hwang hnenah a pe leh a; press conference-a Pep-a'n a hming a theihnghilh vanga 'Korean Guy' a tih, a sak hming Hwang Hee-chan hian chiang zetin chakna goal a khung. Spanish manager pawhin Asian tlangval hi a hming a hre chiang tawh ang.

Havertz-a'n a pet goal

Arsenal manager Mikel Arteta-a'n season liam ta aiin a let 10-a an ṭhat thu a sawi a, Bournemouth lakah an ṭhatzia an pholang. Vitality Stadium-ah Gunners-in goal an khung hma a, Bukayo Saka-a'n minute 17-naah a khung. Martin Odegaard ball vawrhluh chu Gabriel Jesus-a'n goal ban tauh perin a per leh chu Saka-a'n awlsam takin a khung.

Gunners inkhel a nung a, Eddie Nketiah penalty hlawhchhuah chu Odegaard-a'n minute 44-naah a khung leh bawk. Mikhual team an phur zel a, an phurhna belhhchhah turin player thar Havertz-a'n minute 53-naah captain Odegaard-a penalty hlawhchhuah a khung.

Germany international Havertz-a'n Arsenal tana a goal hmasa ber a khung a, hei hian inrintawkna a pe a nih ngat chuan Gunners ṭantuten an beisei ang Havertz ṭha zawk an hmuh theih phahna tur a ni ang. Injury time-ah Ben White-a'n Odegaard freekick a tauh lut a, Arsenal 4-0 in an chak.

Arsenal-in keeper thar David Raya an ring leh a, Spanish keeper hian tlarhnung aṭangin ball a sem nasa. Position tinah Gunners-in hma an sawn a, Man City nen an inkar an tizim zel tih a lang thei. Hei vang hian kartawpa Arsenal-in Man City an mikhual tur hi en a châkawm a, Rodri a la khelh theih dawn loh avangin Arteta leh a hote tan point thum hmuhna remchang a ni thei a ni.