Goal thum khungtu Real a chung berah!

Inrinni zan khan Real Madrid chuan La Liga hmahruaitu Girona chu 3-0 in an sawp a, Spanish top flight league-ah hmahruaitu an ni leh ta - an hnuai chiaha awm Barcelona aiin point khatin an sang zawk.

Real tan Jude Bellingham chuan tun season-a a goal sarihna a khung a, English midfielder hian tun season inelna hrang hrangah match riat khelin goal sarih a khung - assist vawi hnih a nei bawk.

Bellingham hi kum 2009-a Cristiano Ronaldo tih loha tun kum zabia La Liga-a a match hmasa pasariha goal ruk khung tling thei a ni a, record a siam chho mawlh mawlh a ni ber!

Girona khelmualah Real tan Joselu chuan minute 17-naah goal hmahruai a khung a, kum 33 mi striker hian tun season-ah goal li a khung ta - Espanyol aṭanga loan-a an hawh striker hian amah ringhleltute khelmual chhungah a chhanglet zel.

Joselu goal hi Bellingham siamsak niin, Toni Kroos chuan minute 21-naah Aurelien Tchouameni khung tur a siamsak bawk - minute 71-naah Bellingham hian a hmawr bawkin an goal thumna a khung a, Joselu siamsak ve thung a ni.

Girona hi an vanduai, tiin a sawi theih. Yangel Herrera chuan uiawm takin crossbar chungah a tauh a, Viktor Tsygankov chuan post a tauh per a, Kepa Arrizabalaga chuan David Lopez tauh goal tur nia lang a dansak a, Eric Garcia chuan a per lehlam a khung thei lo bawk.

Real tan lawm erawh a kim chuang lo - defender Nacho chu Portu laka a chet dan hlauhawm tak avangin hun pek belhah hnawhchhuah a ni a, Carlo Ancelotti team hian Thawhlehni zanah Champions League match khel turin Napoli an lenchilh zui ang.

Zirtawpni zan khan champion lai Barcelona an chak bawk a, an chakna goal khungtu chu Real Madrid captain hlui Sergio Ramos a ni - Ramos hian a chawr chhuahna Sevilla tan a khel leh tawh a, Zirtawpni zan khan Barca an lenchilh.

Kum 37 mi Ramos hian kum 16 mi Lamine Yamal-a ball tauh chu an lamah a tilut a, a huat kumhlun Barca chakna tur goal a khungsak - he inkhelah hian Sevilla VIP box-ah tun hnaia Barca chet dan lang chhuak duh lohna lantirin tumah an ṭhu lo.

Barca hi referee committee vice president hlui Jose Maria Enriquez Negreira hnena sum peah puh an ni a, chhui mek an ni.