MBA Junior Ranking tournament

September 26 aṭanga neih ṭan MBA Junior Ranking Badminton Tournament chu Inrinni khan khelh zawh a ni ta a, Durtlang rawlthar C. Lalramzauva chu Under-19 mipa singles leh doubles-ah a champion kawp - Chanmari Shuttler Club tana khel lai a ni.

Saron Veng Badminton Club leh Mizoram Badminton Association ṭangkawpin an buatsaih inelna hi Ramhlun Indoor Stadium-ah neih a ni a, category hrang hrang 13-ah inelna buatsaih niin player 200 chuang an inlan thei.

Ngaihven hlawh ber U19 boys singles final-ah seeded no. 1 C. Lalramzauva chuan seeded no. 2 Lalnuntluanga, New Serchhip BC chu 21-5, 21-10 in an hneh a, player pahnih hi Tata Trust (NEIDA) sponsor a ITM University, Raipur a badminton zira awm reng tawh an ni.

MBA level tournament a khelh vawikhatnaah Tirza Lalremruati, Kolasib District Badminton Association (KODBA) chu U13 Girl’s singles category-ah a champion a, final-ah K. Lalrempuii, Hmingsanga BC chu 21-16, 21-15 in a hneh - final-a tlawm Rempuii hian category pathum, U-13 GS, U-15 GS leh U-15 GD-ah te final lut vek mah se a vanduai zawkah a ṭang vek thung.

Mizoramah Tata Trust (NEIDA) leh MBA te thawhhona avangin mumal takin Mizoram hmun hrang hrangah badminton coaching kalpui a ni a, pawl pahnih thawhdunna rah hi lang chhuak zelin Mizoram badminton-in hma a sawn hle.

(Thlalak - C. Lalramzauva)