Mbappe hoin PSG chak zo lo

Paris Saint Germain chuan Luis Enrique kaihhruaina hnuaiah season bul an ṭan fuh lo, forward ṭha Kylian Mbappe hoin khel mah se Ligue 1 hnuai lama awm Clermont lakah goal an khung thei lo a, 0-0 in an inhnehtawk.

Marseille an hneh ṭuma inhliam Mbappe chuan a bul a ṭan thei a, a kerek hliam a na lo tih a takin a lang. Mahse, France captain bakah Randal Kolo Muani leh Ousmane Dembele te khung tur chu Clermont goalkeeper Mory Diaw-a'n a lo dansak vek a ni.

PSG hian tun season Ligue 1 match vawi sarih an khelh aṭangin point 15 an hmu a, table chung berah an awm rih. Mahse, kum 2010-11 hnua season bul an ṭan fuh loh ber ṭum an tawng a, an hnuaia awm Brest aiin match khatin an khel tam zawk.

Enrique chuan, "Clermont hi point hmuh duha thapui thawh lai an ni a, hmachhawn an harsa dawn tih pawh kan hria. Kan rin lawk ang ngeiin min lo dawngsawng a, kan inbuatsaih ang taka kan khel thei lo kha a pawi lai chu a ni.

"A nihna takah chuan chak lo zawk hial thei kan ni, goal khung tumin vawi 21 zet kan pet chungin a hlawhtling lo vek a, point khatah kan lungawi a ngai, tun ṭum kan match hian football hi infiamna rinlawk harsa tak a nihzia a lantir," tiin a sawi.

Spanish manager hian duhthusamin bul ṭan lo mah se Ligue 1 nomawi chu a lak theih a rinawm a, an tum ber tur erawh Champions League a ni dawn - Nilaini zan hian group match khel turin Newcastle United an lenchilh ang.