A lian pathum an chak

Serie A champion lai Napoli leh champion tum Inter Milan leh AC Milan te chuan an khingpui ṭheuh an hneh a, team ṭha pathum hi Italian football boruak siamtu an ni chhunzawm dawn.

Inrinni zan Serie A inkhelah Inter lamin hun chanve hma lamah goal an khung lo, team nem zawk Salernitana an ṭang rei thei viau. Mahse, bench aṭanga Lautaro Martinez a luh hnuah thil engkim a danglam vek.

Argentina international striker hi chawlhlawk aṭanga minute kua a liam hnuah a rawn lut a, khelmual a luh aṭanga minute 27 chhungin goal li a khung, a team hi khualmualah 4-0 in hnehna a chanpui.

Italian football inelna sang ber Serie A-ah hian substitute bench aṭanga lut zingah Martinez hi goal li khung thei hmasa ber a ni hial. Coach Simone Inzaghi-a'n Thawhlehni zana Benfica nen Champions League an khelh hunah chuan a bul aṭangin a luhtir ang.

Inter inkhelh hmain AC Milan an inlan a, coach Stefano Pioli-a naute hian San Siro-ah Lazio chu 2-0 in an hneh. Milan tan Christian Pulisic leh Noah Okafor ten goal an khung, goal pahnihah hian Rafael Leao a ṭangkai hle.

Milan hian Serie A match an khelh vawi sarih aṭangin point 18 an hmu a, hmahruaitu an ni lailawk zauh. Mahse, an chak hnuah Inter-in point 18 an rawn hmu ve leh a, head to head leh goal difference nei ṭha zawk Inter hi a chungah an lawnkai leh nghal a ni.

Inkhel dangah champion lai Napoli pawhin Lecce chu 4-0 in an sawp. Tun hnaia club nena boruak ṭha tawk lo Victor Osimhen chuan goal a khung leh a, club nena boruak an neih hnuah match hnih khel leh tawhin goal a khung ve ve.

Nigerian international striker bakah hian Leo Skiri Ostigard, Gianluca Gaetano leh Matteo Palitano ten goal khat ṭheuh an khung bawk. Rudi Garcia-a naute hian Thawhlehni zanah Real Madrid chu Champions League khel turin an mikhual leh ang.