Leipzig lakah Bayern an 'comeback'

Bayern Munich-in DFL Supercup-a an hneh loh RB Leipzig lakah phuba lak an tum a, an beisei ang ngawt a ni lo. Red Bull Arena Leipzig-ah mualneituin goal hnih an khung hmasa a, Bayern hian goal hniha chhangletin 2-2 in an inhnehtawk.

Minute 20-na lekah Leizpig-in goal an khung a, Xaver Schlager 'penetration pass' ṭha chu Lois Openda-a'n um lutin goal hmahruai a khung. Corner kick-ah Bayern keeper Sven Ulreich-a'n ball kal a chhut sual a, a khawih phak loh chu Openda-a'n tauh letin Castello Lukeba-a'n minute 26-naah Leipzig goal hnihna a khung.

Bayern an vannei a, Leroy Sane freekick pet chu wall-a ding kut a per a, VAR hmanga ennawn hnuah mikhual team-in penalty an hmu. Harry Kane-a'n minute 57-naah penalty aṭangin siphurh a sut ṭhen. Bayern an phur zel a, minute 70-naah Jamal Musiala-a'n ṭha takin a khalh chhuak a, a ball pek chu Sane-a'n khalh lutin siphurh sutna goal a khung.

Minute 20 la awm mah se goal dang hmuh tur a awm tawh lo. Bayern leh Leipzig 2-2 in an inhnehtawk. Inkhel dangah Bayern elpui Borussia Dortmund leh Bayer Leverkusen te an chak ve ve.

Bayer Leverkusen hi Xabi Alonso enkawl a ni a, match ruk khelh tawhah chak loh la nei loin league hmahruaitu an ni mek. Spanish manager Alonso hi season thara Real Madrid enkawl tura sawi a ni. Alonso erawh, "September thla chauh a ni a, a la hma mah mah," tiin a hmalam hun tur a sawi chiang duh lo.