Keeper tluk vangin inkhel titawp

Netherlands-a football inelna sang ber Eredivisie-ah RKC Waalwijk leh Ajax te Inrinni khan an inkhel a, minute 84-naah mualneitu Waalwijk keeper Etienne Vaessen a tluk avangin inkhelh tihtawp a ni.

Inkhel tihtawp hma hian Ajax-in 3-2 in hma an hruai mek. Minute 84-naah keeper Vaessen leh Ajax forward Brian Brobbey te an insu a, keeper hi a chet miah loh avangin player ṭhenkhat mittui a tla hman.

RKC Waalwijk chuan, "Khelmual aṭanga zawn chhuah lai hian a rawn har a, a dinhmun enfiah turin damdawi in panpui a ni. Lung harsatna a ni lo a, chutihrualin khelmual a chhuahsan lai khan a awmna hmun a hre lo," tiin thuchhuah an siam.

Ajax chuan Twitter tia hriat lar ṭhin X-ah, "Football aia pawimawh hi a awm. Etienne, ṭawngṭainaah kan hre reng che," tiin thuchhuah an siam ve bawk.