FA Cup-ah Chelsea leh Everton chak awlsam

Pathianni zan FA Cup fourth round inkhelah Chelsea-in Milton Keynes Dons 5-1 in an sawp a, first half-ah Brazilian midfielder Oscar-a'n hattrick a siam. Everton-in khualmualah Arouna Kone, Aaron Lennon leh Ross Barkley te goal hmangin Carlisle United 3-0 in an sawp ve bawk.

Stadium MK lamah

Chelsea manager lai lawk Guus Hiddink-a'n season bul hmang ṭha lo leh ṭhâl hliam dam hlim Eden Hazard chu January 3 hnua a vawi khatna atan starting eleven-ah a dah lut a, Belgian winger hian minute 55-naah penalty aṭangin a khung.

Season liam ta Premier Lea-gue player of the year Hazard a khel ṭha a, first half-ah chance ṭha hlah mah se match 28 goal a khung loh hnua a pet goal leh takah chuan inrintawkna a neih leh ngei beisei a ni a, Chelsea hma-tawng an hlauawm sawt ang.

Hazard-a'n goal a khung hnuah Chelsea tan substitute Bertrand Traore chuan club tana a goal hmasa ber a khung bawk. Second half-ah goal hnih a lut a, minute 90 chhunga langsar ber erawh first half-a hattrick siamtu Oscar a ni. Brazilian midfielder hi September 2014-a Diego Costa-a'n Swansea lama goal thum a khung hnua Chelsea tana hattrick siam leh hmasa ber a ni.

Chelsea-in Championship-a 20-naa awm mek MK Dons an hneh a, Dutch manager Hiddink-a hnuaia match riat an khelh tawhah chak loh an nei lo. Blues hian fifth round-ah Manchester City an hmachhawn dawn a, Chelsea boss-in an hmabak huphurh-awm zia a a hrechiang hle.

Blues manager lailawk Hiddink chuan, "Final ang mai a ni. City nena kan inkhel tur hi a pawimawh takzet," tiin 2009 FA Cup-a Chelsea champion puitu chuan a sawi a, a player-te khelh dana a lungawi thu a sawi tel bawk.

Everton an tho chhuak

League Cup semifinal-ah Everton-in Manchester City an hneh lo a, manager Roberto Martinez chuan referee thu-tluk-na dik loh vang chauha chak loah a inngai. FA Cup-ah erawh Everton khingpui chu Man-ches-ter City anga club lian an ni lo a, League Two club Car-lisle United awlsam takin an hneh.

Brunton Park-ah Kone-a'n ṭan aṭanga minute hnihna lekah Everton goal hmahruai a khung a, Carlisle-in sutna hun ṭha nei mah se Derek Asamoah-a'n Toffees keeper Joel Robles-a zawnah a pet. Minute 14-naah Lennon-a'n mikhual team goal hnihna a khung a, minute 65-naah Barkley-a'n chak nemnghehna goal a khung bawk.

Everton boss Martinez-a'n player ṭha a luhtir a, Tom Cleverley chu an chakna kawnga player pawimawh a ni. Manchester United midfielder hlui hian ball a khawih hnem ber a, a ball pass 95% zet chuan a pet tumna tak a thleng bawk.

Everton manager Roberto Martinez chuan, "Chetsual a thiang lo tih kan hria a, ka player-te pawhin professional an nihna lantirin ṭantirh aṭang-in inkhel an thunun a, round sang zawk thleng turin harsatna kan tawk lo," tiin a sawi.

Toffees hian fifth round-ah Premier League club Bour-nemouth an hmachhawn ang.