French Open champion duh Djokovic

World number 1 Novak Djo-kovic chuan a vawi ruk nana Aus-tralian Open a champion zawh hnu lawkah Grand Slam an khelh leh hmabak French Open-ah champion a duh thu a sawi chhuak.

Serbian thiampuipa Djokovic hian Grand Slam title 11 ngawt a la tawh a, amaherawhchu clay court-a an khelh ṭhin French Open-ah hian a la champion lo thung.

Roland Garros-ah hian vawi thum final lut tawh mah se a la hlawhtling lo a, nikum pawh khan final lut mah se Swiss star Stan Wawrinka lakah a tlawm a ni.

Kum 28-a upa Djokovic chuan, "Tunah chuan tunhma lama ka la hlawhtlin theih lohna French Open title lak ka tum leh dawn a, ka hma-chhawp a ni. Ka rilruin Paris lam a hawi nghal der tawh," tiin dai ngai loh ram dai chhunzawm zel a tum.

Djokovic chuan sawi chhun-zawmin, "Tun hnai thla 15 chhunga ka tennis khelh dan hi chu ka beisei aia ṭha zawk mah a ni a, hlawhtling zel tur chuan ka khelh ṭhat hi ka chhawmnun zel a pawimawh," a ti.

'Djoker Slam' tia hming lem an vuah sak chu Djokovic chuan a huat hran loh thu leh a duhzawng a nih thu fiamthuin a sawi tel bawk.

Nikum khan Djokovic hian Aus-tralian Open, Wimbledon leh U.S. Open title a la a, tun hnai kum nga chhunga a vawi li nan world number 1 ni chungin season a khar a ni.