Man United mikhual tur Galatasaray

UEFA Champions League-ah zanin dar 12:30 hian Manchester United-in Old Trafford-ah Galatasary an mikhual dawn. Erik Ten Hag-a hote hian match hmasa berah Bayern Munich an hneh loh avangin knockout stage lut tur chuan Turkish club an hneh hi a pawimawh hle.

Group A inkhel dangah zanin dar 12:30 hian Bayern-in Copenhagen an tlawh ve bawk ang. Group khat aṭangin pahnihin last 16 an lut dawn a, pathumna hi Europa League-ah an tla thung dawn.

Chetsual theihna

Man United tan tun dinhmunah eng team pawh chetsual theihna a ni a, chutihrualin zanina an khingpui tur Galatasary hi chu an khelh ṭhat laia an hmachhawn tur pawh ni se chetsual theihna tur an ni.

Turkish club hian tun season-ah chak loh an la nei miah lo a, UCL group stage khel tur pawhin Zalgiris, Olimpija Ljubljana leh Molde te an hneh tawh. Super Lig-ah pawh match hmasa bera Kayserispor nen an inhnehtawk tih loh chu an la chak vek.

Galatasaray hian hming langsar Mauro Icardi, Dries Mertens, Wilfried Zaha, Lucas Torreira, Davinson Sanchez leh Fernando Muslera te an kawl. Manager Okan Buruk hi a inkhelh hun laia Inter Milan tan te pawh lo khel tawh a ni a, player a nih laiin Galatasary hi nomawi ṭhahenm tak a chawipui tawh.

Chutihrualin Galatasaray hian UCL-ah bul an ṭan ṭha bik lo a, Copenhagen lakah 2-0 in an hnufual. Danish club player pakhat hnawhchhuah a nih hnuah Turkish club hian an tamna hmang ṭangkaiin hun tawp dawn hnaiah siphurh an sut hram.

Fuh lo a awm

Man United manager Erik Ten Hag-a'n season khatnaah League Cup nomawi a chawipui nghal, nipui bazarah goalkeeper ball sem thiam Andre Onana lalutin midfield tichak turin Mason Mount bakah loan hmangin Sofyan Amrabat an lalut bawk.

Luke Shaw inhliam laiin a thlakna tur an la hman a, Sergio Reguilon an chang bawk. Tlarhmaah Danish striker Rasmus Hojlund an lalut - transfer-a an chet dan thlir mai chuan Man United hi season liam ta aia ṭha sawt tura ngaih an ni.

Mahse, Premier League lamah kar tin deuh tho Man United hi an mualpho a, an la insiamrem thei lo. Striker thar Hojlund-a'n Bayern an hneh loh ṭuma goal a khung bak a la khung miah lo bawk.

Hojlund hi kum 20 mi lek a la ni a, mawhphurhna zawng zawng la tur chuan tawnhriat a la nei tlem hle. Season liam ta khan Atalanta tan Serie A match vawi 32 khelin goal kua a khung a, hei hi season khata league match vawi 15 aia tam a khelhna hmasa ber a ni.

Danish striker phurrit chhawk zângkhai thei tura ngaih Marcus Rashford-a'n tun season-ah goal khung a la harsat a, Jadon Sancho leh Antony te lah khelmual pawna buaina avangin hman ṭangkai theih an ni lo. Brazilian forward Antony erawh Galatasary lakah hian inlan leh thei dinhmunah a ding thung.

Man United tan tlarhma buaina chinfel a ṭul a, Premier League 'big six' tia chhal zingah Chelsea nen chiah goal 15 an la khung tling lo. Ten Hag-a nauten league-ah goal sarih chiah an la khung a, goal 11 ngawt an chhuah!

Tlarhma chauh ni loin tlarhnung a buai tel tihna a ni a, UCL-ah pawh Bayern lakah goal li ngawt an chhuah bawk. Lisandro Martinez inhliam vangin a la khel lo rei dawn a, kartawpa Crystal Palace an hneh loh ṭumin tlarhnung laia inkawp Raphael Varane leh Victor Lindelof te an khel tluan lo ve ve.

Ten Hag-a'n tlarhnung leh tlarhmaah siam ṭhat tur a nei a, Galatasary an mikhual hunah siamṭhat a tum dawn. Tun dinhmuna a lan dan mai chuan player siksawia ṭha mai tur niin a lang lo a, an khelh dan her rem hret a ngai tel niin a lang bawk.

Kane leh Goal

Bayern-in Copenhagen a tlawh dawn a, Thomas Tuchel-a hote hi chak tura ngaih an ni. England captain Harry Kane-a'n goal engzat nge a khung ang tih chu zawhna a ni zawk.

English striker Kane hian Bayern kawr a hak hnuah DFL Supercup-a Leipzig an hneh loh leh Borussia Monchengladbach an hneh ṭumah chauh goal a khung lo. Bundesliga-ah Kane hian match ruk bul ṭanin goal riat a khung a, penalty pettu a nih bawk avangin goal a khung zel a rinawm.

UCL-ah pawh Kane hian Man United lakah penalty aṭangin a khung a, Copenhagen tlarhnung pawhin an ven uluk a ṭul dawn. Chutihrualin Kane erawh player danglam bik a ni a, no. 9 a nih rualin a ṭhiante tan ball a pe chhuak thei bawk. Man United an hmachhawn ṭumah Serge Gnabry leh Leroy Sane ten hmunruak an neih theih nan hna ṭha tak a thawk a, Copenhagen an hmachhawn hunah Tuchel-a'n engtin nge a chhawr dawn tih chu zaninah a hriat ang.