Japan ramah Jorge Martin a chak

Ruah surin a tihbuai deuh karah Japanese MotoGP an tlan a, bike intlansiakna sangah hian Jorge Martin a tlan chak ber. Spanish rider hnungah hian Francesco Bagnaia leh Marc Marquez te an thleng.

Intlansiak tir lamah ruah a sur a, hei hian inelna boruak pawh a tidanglam. Martin hi a tirah a che fuh lo ve deuh, mahse kawng dik a zawh leh thei. A teammate Johann Zarco erawh chesualin a tlan chhunzawm ve thei tawh lo.

Kum 25 mi Jorge Martin chuan, "A tirah khan kawng sir ka dai deuh a, tlankawng pangngai ka zawh chhunzawm leh thei mai kha ka lawm hle. A hnu lama ka ṭhiante chesual erawh a pawi ka ti, a nihna takah chuan kawng a huh hi chuan a hlauhawm ṭhin," a ti.

MotoGP season kal laiah intlansiak paruk an la hmabak. October 15, Pathianni hian Indonesia Grand Prix an tlan leh ang. Inelna neih tawh chinah point 219 neitu Francesco Bagnaia chuan hma a hruai, pahnihna Martin aia a sanna erawh point thum chauh a ni thung.