Rilru a khawih khawp mai - Rice

Arsenal player zingah duhsak hlawh bik an awm lo a, a khel ṭha leh boruak nei lian deuhte pawhin a che ṭha lo zawkte an dawm kang. Declan Rice chuan Kai Havertz laka a ṭhiante chet dan chuan a rilru a hneh hle tih a sawi.

Germany international Havertz hian Chelsea aṭangin Gunners a zawm a, pound maktaduai 65 man tehmeuh niin, Gunners player hlawh hnem berte zinga mi a ni bawk. Mahse, an beisei angin goal a khung lo a ni satliah lo, a khel ṭha tawk lo bawk.

Mikel Arteta-a'n a player thar hi hmangaih taka enkawl a ngai tih a sawi a, a naute pawhin an ṭawmpui. Premier League inkhela Bournemouth an hneh ṭumin Bukayo Saka leh Martin Odegaard te chuan penalty an kian a ni.

Blues forward hlui Havertz hian penalty a khung a, goal a khung hma hian Arsenal hi 2-0 in an sang fal sa tawh. Mahse, a ṭhiante chuan chakna goal hlu bik khung ang maiin an lawmpui, a tan chuan a hlu danglam khawp ang.

Rice chuan, "Kan training ho reng a, a theihna sanzia a takin ka hria. Khelmual chhungah pawh theihtawp takmeuh a chhuah ṭhin, goal a khung mai loh avangin a tan boruak a nuam lo ngei ang tih pawh ka hrethiam.

"A goal hian inrintawkna a siamsak ngei pawh ka beisei. Player naupang rual tam tak awm khawmin manager chungah rinna an nghat a, a nihna takah chuan engkim mai kha a nuam êm êm vek a, rilru a hneh hle bawk," tiin a sawi.

Arsenal tana penalty pettu ber chu Saka a ni. England international forward hian a hma pawhin captain Odegaard chu penalty a kian a, a vawi hnihna pawh Havertz tan a kian phal - Saka chet dan hi Rice chuan ropui a tih thu a sawi bawk.

Gunners hian Champions League an khel chhunzawm dawn, zanin dar 12:30 hian Ligue 1 club Lens an lenchilh dawn. An group match hmasa zawkah PSV chu 4-0 in an lo hneh tawh a, tun ṭumah pawh hian chak an beisei dawn.

Chutihrualin, kar tawpah EPL champion Manchester City an mikhual zui leh nghal dawn. Arteta nauten league champion nih an duh chuan Citizens hneh theih hi a pawimawh, Spanish manager hian UCL-ah a player a siksawi deuh a nih pawhin a mak hran lo ang.