Mumbai-in Champions League khel dawn

AFC Champions League khelh meka an match hnihna chu Mumbai City chuan zanin dar 7:30 hian an khel dawn a, khualmualah Uzbekistan club ṭha PFC Navbahor Namangan an lenchilh dawn.

Uzbek club ṭha Navbahor hian an match hmasa zawkah Al Hilal chu khualmualah 1-1 in an inhnehtawkpui thei a, he inkhelah hian Saudi club tan Neymar, Aleksandar Mitrovic, Ruben Neves leh Malcom ten inkhel bul an ṭan vek!

Mumbai forward Lallianzuala Chhangte chuan, "Navbahor hi kan huphurh hran lo a, mahse, a awlsam lo ang. Club ṭha an ni a, an league-ah pahnihna an ni mek - khualmuala khel tur kan ni bawk.

"Hneh theih loh chu an ni lo ang a, mahse, hneh tur chuan kan ṭan mar a ngai dawn. ISL khelh tho ngai nen, zin chauh nen, a hahthlak duh khawp mai. Mahse, hneh ngei erawh kan tum dawn," tiin Vanglaini a hrilh.

Mumbai City hian Lianzuala bakah Lalengmawia Ralte (Apuia) leh defender Hmingthanmawia Ralte (Valpuia) an kawl a, Mizo tlangvalten Asia khawmualpuia club inelna sang ber zaninah an khel dawn.

ISL club Mumbai hian beisei ang erawhin bul an ṭan lo - an match hmasa berah hneh ngei tura ngaih Nassaji Mazandaran chu inkhel thunun chungin 2-0 in an hneh lo a, zaninah match hmasa anga chance khawhral a rem tawh lo ang.

Mumbai tan Georgian forward Toma Tabatadze ven uluk a ṭul a, ani hian tun season-a match 24-a khelhah goal 11 khung tawhin, Al Hilal lakah pawh a khung - Montenegro international defender Milos Milovic leh Uzbekistan keeper Utkir Yusupov te hi Navbahor inchhuanna an ni bawk.